მთავრობის სხდომაზე პრემიერ-მინისტრმა, ირაკლი ღარიბაშვილმა განაცხადა, რომ 2024 წლის 1 იანვრიდან 2013 წლამდე წარმოებული ავტომობილების იმპორტი ქვეყანაში იკრძალება. თემასთან დაკავშირებით სოციალურ ქსელში სტატუსს აქვეყნებს საქართველოს ავტო იმპორტიორთა ასოციაციის თავმჯდომარე, ლაშა დარბაისელი. მისი განმარტებით, ავტომობილების სფეროში აღნიშნული ცვლილებები ზიანის მომტანი იქნება:
,,მსგავსი შეზღუდვები, მსგავსი ხისტი გადაწყვეტილებები დააზიანებს:
1. საქართველოს მოქალაქეებს, რომელთა უმეტეს ნაწილს იმის საშუალება და ფუფუნება არ აქვს შეიძინოს და განაბაჟოს 2013 წლის ზემოთ წარმოებული ავტომობილი. მოქალაქეები იძულებულნი იქნებიან შეიძინონ საქართველოში უკვე არსებული და მოძველებული ავტომობილები, რაც ავტოპარკის უფრო მეტად დაძველებას და მწყობრიდან გამოსვლას გამოიწვევს.
2. ბიზნესს, ადამიანებს, რომლებიც დასაქმებულნი არიან ამ სფეროში, მომიჯნავე სექტორებში, ასევე დაზარალდებიან ადამიანები, რომელთაც ავტომობილები საკუთარი ბიზნეს საქმიანობისთვის სჭირდებათ.
საქართველოსა და დანარჩენ მსოფლიოს შორის საქონლით საგარეო ვაჭრობის დეკლარირებულ (არაორგანიზებული ვაჭრობის გარეშე) მონაცემების მიხედვით უმსხვილეს საექსპორტო სასაქონლო ჯგუფში მსუბუქი ავტომობილები (სეს ესნ-ის კოდით 8703) პირველ ადგილს იკავებს. 2022 წელს დარგის წლიურმა სავაჭრო ბრუნვა 2.5 მილიარდი აშშ დოლარი, ხოლო აქციზისა და იმპორტის გადასახადის სახით წლიურმა შემოსავალმა სახელმწიფო ბიუჯეტში 239.143 მილიონი ლარი შეადგინა. დარგსა და მომიჯნავე სფეროებში დასაქმებულია ათეულობით ათასობით საქართველოს მოქალაქე.
ეს მხოლოდ მცირე ჩამონათვალია იმ პრობლემებისა, რასაც აღნიშნული კანონი უახლოეს პერიოდში ჩვენს ქვეყანას მოუტანს. ყველაზე ცუდი კი ის არის, რომ ეკოლოგიური პრობლემა მაინც გადაუჭრელი დარჩება”, – წერს ლაშა დარბაისელი ფეისბუქის პირად გვერდზე.
ავტორი
ნინი ხიჯაკაძე
