პრემიერ-მინისტრის, ირაკლი ღარიბაშვილის გზავნილებზე მწვავე და კრიტიკულ შეფასებას აკეთებს ,,ერთიანი ნაციონალური მოძრაობის” თავმჯდომარე, ლევან ხაბეიშვილი:
,,NATO-ში გაწევრიანებაზე პირველი დეკლარირებული უარი განაცხადა რუსმა ირაკლი ღარიბაშვილმა, რომელიც ასევე კრემლიდან, პუტინის რუსეთის მიერ იმართება.
ჩვენი ქვეყნის ტერიტორიული მთლიანობისთვის, მიტაცებული ტერიტორიების დასაბრუნებლად, NATO-ში და ევროკავშირში გაწევრიანება არის უმნიშვნელოვანესი.
ვის არ უნდა საქართველოს ნატოში და ევროკავშირში გაწევრიანება? – ეს არის პუტინი, ოფიციალური მოსკოვი და ჩვენდა სამწუხაროდ საქართველოში მოკალათებული რუსული პარტია ბიძინა ივანიშვილის მეთაურობით.
ეს არ არის პოლიტიკური საკითხი, ეს არ არის ვიწროპარტიული თემა – საქართველოს მოქალაქეებმა კარგად უნდა იცოდნენ, რომ ეს არის ეროვნული თემა, ჩვენი ქვეყნისთვის მნიშვნელოვანი საკითხი და საზოგადოების თითოეულმა წევრმა უნდა გააცნობიეროს პასუხისმგებლობა ჩვენი ქვეყნის მომავლის, ჩვენი შვილების წინაშე.
ამიტომ, ჩვენ მივმართავთ საერთაშორისო თანამეგობრობას, დაიწყოს პოლიტიკური ხელმძღვანელობის სანქცირების პროცესი და ცხადია, ეს, პირველ რიგში, ეხება რუს ოლიგარქ ბიძინა ივანიშვილს, რომელმაც საკუთარ სათამაშოდ აქცია ჩვენი ქვეყანა”, – განაცხადა ლევან ხაბეიშვილმა.
ავტორი
ნინი ხიჯაკაძე
