“საქართველო კანდიდატის სტატუსს სხვაზე წინ იმსახურებს” – მამუკა მდინარაძე

საქართველოს პრემიერ-მინისტრის, ირაკლი ღარიბაშვილის რეიკიავიკის სამიტზე წარმოთქმულ სიტყვაზე, პოლიტიკურ შეფასებას აკეთებს ფრაქცია ,,ქართული ოცნების“ თავმჯდომარე, მმართველი პარტიის აღმასრულებელი მდივანი, მამუკა მდინარაძე:

,,ოდნავ მაინც ობიექტურად თუ ვინმე შეაფასებს იმას, რაც ამ ქვეყანაში ხდება, საქართველო, არ მოვერიდები ამის თქმას, – კანდიდატის სტატუსს სხვაზე წინ იმსახურებს.

საქართველო სხვა ქვეყნებზე წინ იმსახურებს, რომ გახდეს ევროპული ოჯახის სრულფასოვანი წევრი – თავისი გატარებული რეფორმებით, სწორი პოზიციებით.

ყველაზე მავნებლური და გოიმური მესიჯი ოპოზიციას რაც შეიძლება ჰქონდეს, ეს არის – გარეთ ასე, რომ ლაპარაკობთ, შიგნით ამას ლაპარაკობთ. რას ჰქვია შიგნით და გარეთ?! ანუ ჩვენ აქ რასაც ვლაპარაკობთ, გარეთ ის არ იციან, დახურულ ფორმატშია, ტელევიზიები არ არის საქართველოში?! გარეთ და შიგნით რას ქვია?! ვლაპარაკობთ ერთი და იგივეს!

ჩვენ ვლაპარაკობთ 2 მთავარ მესიჯზე:

1. საქართველოს მომავალი არის ევროპაში, საქართველო აუცილებლად გახდება და უნდა გახდეს ევროპული ოჯახის სრულფასოვანი წევრი;

2. საქართველო ეროვნულ ინტერესებზე, თავის ტრადიციებზე, ეროვნულ იდენტობაზე, ოჯახზე, სარწმუნოებაზე – ამ ყველაფერზე არასდროს იტყვის უარს“, – განაცხადა მამუკა მდინარაძემ.

ავტორი
ნინი ხიჯაკაძე