“კატეგორიულად და მწვავედ მოვითხოვთ, სასწრაფოდ მოწვეულ იქნას პარლამენტის რიგგარეშე სხდომა და ერთჯერადი კვება სკოლებში ერთხელ და სამუდამოდ იქნეს დაკანონებული” – შალვა ნათელაშვილი

გაეროს ბავშვთა ფონდის მიერ გამოქვეყნებულ შეფასებებს ეხმაურება ,,ლეიბორისტული“ პარტიის თავმჯდომარე, შალვა ნათელაშვილი და სპეციალურ ბრიფინგზე საგანგებო განცხადებას აკეთებს საჯარო სკოლებში უფასო კვების უზრუნველყოფის აუცილებლობასთან დაკავშირებით. ოპოზიციონერი ლიდერი აცხადებს, რომ მნიშვნელოვანია სკოლის მოსწავლეებს ჰქონდეთ სათანადო პირობები, როგორც მასალის აღქმისთვის, ასევე სრულფასოვანი ფიზიკური განვითარებისთვის:

,,საქართველო ოფიციალურად გადაიქცა ერთადერთ ქვეყნად, სადაც ხორციელდება ბავშვთა გენოციდი; სადაც მმართველი ელიტის შვილები სპეცკორტეჟებით დადიან კერძო სკოლებში, გაძლიერებული ოთხჯერადი კვებით, ხოლო ჩვეულებრივ საჯარო სკოლებში 100 ათასობით მოსწავლე შიმშილობს, რის გამოც მათ არ შეუძლიათ არა მარტო შესასწავლი მასალის აღქმა, არამედ შეუძლებელი ხდება ნორმალური ფიზიკური განვითარება.

ჩვენ, ,,ლეიბორისტულმა პარტიამ“, რამდენიმე წლის წინ, პარლამენტში კანონპროექტი შევიტანეთ განათლების კანონში ცვლილებების შესახებ, რომლითაც დაკანონდებოდა უფასო ერთჯერადი კვება სკოლებში. ეს დღემდე არავის გახსენებია!

სანამ მშობლებთა ერთად აქტიურ მოქმედებებზე გადავიდოდეთ, კატეგორიულად და მწვავედ მოვითხოვთ, სასწრაფოდ მოწვეულ იქნას პარლამენტის რიგგარეშე სხდომა და ერთჯერადი კვება სკოლებში ერთხელ და სამუდამოდ იქნეს დაკანონებული.

გამოიყვანონ მმართველი ელიტის წარმომადგენლებმა თავიანთი შვილები კერძო სკოლებიდან, შეიყვანონ ჩვეულებრივ სკოლებში, სადაც ხალხის შვილები დადიან“, – განაცხადა შალვა ნათელაშვილმა.

ავტორი
ნინი ხიჯაკაძე