ადვოკატი დიმიტრი საძაგლიშვილი განცხადებას აკეთებს ,,მთავარი არხის” გენერალური დირექტორის, პატიმრობაში მყოფი ნიკა გვარამიას საკასაციო საჩივართან დაკავშირებით. მისი განცხადებით, მოსამართლე მერაბ გაბინაშვილის საქმიდან აცილების მოთხოვნაზე პასუხი კვლავ არ მიუღიათ. ასევე, აღნიშნავს, რომ პალატის მიერ საქმის განხილვისას, აცილებაზე გადაწყვეტილება უნდა მიიღოს სხვა მოსამართლემ და არა მან, რომლის აცილებასაც ითხოვს მხარე:
,,ჩვენ 10 დღის წინ მივმართეთ უზენაეს სასამართლოს მოსამართლე მერაბ გაბინაშვილის აცილების მოთხოვნით. მიუხედავად იმისა, რომ კანონით სასამართლო ვალდებული იყო 3 დღის ვადაში განეხილა ჩვენი შუამდგომლობა, დღემდე არ არის ეს შუამდგომლობა განხილული.
ცალკე გამოსაყოფია ის გარემოება, რომ ეს შუამდგომლობა, როგორც ჩვენთვის ცნობილი გახდა თავად უზენაესი სასამართლოსგან, აწერია მერაბ გაბინაშვილს. მაშინ, როდესაც კანონის თანახმად, პალატა როდესაც იხილავს საქმეს, აცილებაზე გადაწყვეტილება უნდა მიიღოს სხვა მოსამართლეებმა და არა იმ მოსამართლემ, რომლის აცილებასაც ითხოვს მხარე.
შესაბამისად, ჩვენ ვითხოვთ უზენაესი სასამართლოს მხრიდან, რომ ნუ არღვევენ კანონით გათვალისწინებულ ვადებს და ჩვენი შუამდგომლობის განხილვის პროცედურას.
მერაბ გაბინაშვილის აცილების შუამდგომლობის ეფუძნება 2 ძირითად არგუმენტს. პირველი გახლავთ ის, რომ კანონით გათვალისწინებული საქმის განხილვის ერთიანი 6 თვიანი ვადის ნახევარზე მეტი ისე ამოიწურა, რომ არა თუ საქმის განხილვა არ იყო დაწყებული, არამედ პალატის შემადგენლობა არ არის დაკომპლექტებული. ჩვენ რამდენჯერმე მივმართეთ წერილობით სასამართლოს და მოვთხოვეთ ინფორმაცია, თუ ვინ და რა შემადგენლობით განიხილავდა პალატა ნიკა გვარამიას საკასაციო საჩივარს. თუმცა, მათგან პასუხი იყო, რომ ჯერ-ჯერობით უცნობია პალატის შემადგენლობა.
მეორე არგუმენტი გახლავთ ის, რომ მერაბ გაბინაშვილი არის კლანის ერთგული წევრი. ის დანიშნული იყო უზენაეს სასამართლოში კანონის მოთხოვნათა უხეში დარვევით. ეს არ არის მხოლოდ ჩვენი პოზიცია, ეს არის, მათ შორის, ვენეციის კომისიის პოზიცია”, – განაცხადა დიმიტრი საძაგლიშვილმა.
ავტორი
ნინი ხიჯაკაძე
