“რაც შეეხება პაციენტის მდგომარეობას – ანალიზების, ლაბორატიული მონაცემების კუთხით, არის გაუმჯობესება” – ზურაბ ჩხაიძე მიხეილ სააკაშვილის ჯანმრთელობის მდგომარეობაზე

კლინიკა ,,ვივამედის“ კლინიკური დირექტორი ზურაბ ჩხაიძე ჟურნალისტებთან კომენტარს აკეთებს საქართველოს მე-3 პრეზიდენტის ჯანმრთელობის მდგომარეობასთან დაკავშირებით. მისი განცხადებით, განმეორებით ჩატარებულმა პისიარ ტესტმა კოვიდ ინფექციასთან მიმართებაში უარყოფითი პასუხი აჩვენა. იგი, ასევე, საუბრობს მიხეილ სააკაშვილის მიერ გონების კარგვის ეპიზოდზე:

,,რაც შეეხება პაციენტის მდგომარეობას, მოგახსენებთ. პირველ რიგში მინდა გითხრათ, რომ გუშინ გავიმეორეთ ,,პისიარ’’ ტესტი და მივიღეთ უარყოფითი პასუხი. კოვიდ ინფექციასთან დაკავშირებით, უკვე ,,პირისარ’’ ტესტი არის უარყოფითი. გუშინ გადამოწმდა სხვადასხვა ლაბორატორიული ანალიზები. უნდა ითქვას, რომ ანალიზების ლაბორატიული მონაცემების კუთხით, არის გაუმჯობესება.

წუხანდელ შემთხვევასთან დაკავშირებით [მიხეილ სააკაშვილის გონების დაკარგვაზე] ვესაუბრეთ ჩვენ საბადრაგო სამსახურს, პერსონალურ ექთანს, რომელიც იმყოფება იქვე. მათ მიერ გონების კარგვა უშუალოდ ნანახი არ ყოფილა. პაციენტის გადმოცემით – მან წამიერად დაკარგა წონასწორობა და ადგილი ჰქონდა დაცემას, როგორც თვითონ ამბობს. ექთნის მიერ ნანახი იქნა უკვე უშუალოდ საწოლში და მან განუცხადა ის, რაც მოხდა, როდესაც ის შევიდა ტუალეტში.

არანაირი დაზიანებები არ აღენიშნება, როგორც თვითონ ამბობს – არც ტკივილს უჩივის, არც თავის დარტყმა არ ყოფილა, უბრალოდ ზურგით მოხდა კედელთან შეხება. ასეთი ყოფილა.

რაც შეეხება პარენტერალურ კვებას, მე მინდა კიდევ ერთხელ განვაცხადო – პაციენტი უარს აცხადებს ინფუზიურ თერაპიაზე, პარენტერალურ კვებაზე“, – განაცხადა ზურაბ ჩხაიძემ.

ავტორი
ნინი ხიჯაკაძე