აშშ-ის სახელმწიფო დეპარტამენტი მიხეილ სააკაშვილის ჯანმრთელობის მდგომარეობაზე პასუხისმგებლობას საქართველოს ხელისუფლებას აკისრებს. აღნიშნულ გზავნილზე პოლიტიკურ შეფასებას აკეთებს ,,სტრატეგია აღმაშენებლის” პოლიტიკურ საბჭოს წევრი სერგო ჩიხლაძე:
,,სამწუხაროდ, ძალიან მარტივად არის საქმე. ერთ მხარეს დგას ცივილიზებული სამყარო – დასავლეთი, ევროკავშირი, შეერთებული შტატები, ყველა საღად მოაზროვნე ადამიანი, ჩვენი უკრაინელი მეგობრები – ყველა ერთ მხარეს არის! მეორე მხარეს არის მხოლოდ ,,ქართული ოცნება”, მისი სატელიტები და რუსეთი.
ამიტომ ძალიან მარტივია, რატომ არ დგამს ნაბიჯებს პრორუსი ,,ქართული ოცნების” ხელისუფლება! ისინი არიან რუსეთის მხარეზე, ისინი ასრულებენ რუსეთის დაკვეთას.
ყველაფერს, რასაც ითხოვს დასავლეთი, ამის საწინააღმდეგოს გააკეთებს ,,ქართული ოცნება“, – განაცხადა სერგო ჩიხლაძე.
ინფორმაციისთვის: ამერიკის შეერთებული შტატების სახელმწიფო დეპარტამენტის სპიკერი ნედ პრაისი საქართველოს ხელისუფლებას მოუწოდებს მიხეილ სააკაშვილისთვის სათანადო მკურნალობის გაწევისკენ:
,,რაც შეეხება ბატონ სააკაშვილს, როგორც ადრე თქვით, საქართველოს მთავრობის პასუხისმგებლობაა, მოეპყროს მას სამართლიანად და ღირსეულად, მათ შორის, ყველა საჭირო სამედიცინო და ფსიქოლოგიური მკურნალობის გაწევით, როგორც ეს განსაზღვრულია სახალხო დამცველის ექსპერტების მიერ.
რა თქმა უნდა, მათ უნდა უზრუნველყონ, რომ სააკაშვილის უფლებები დაცული იყოს და მიიღოს ყველანაირი სამედიცინო მეთვალყურეობა, რაც მას სჭირდება”, – განაცხადა ნედ პრაისმა.
ავტორი
ნინი ხიჯაკაძე
