“საქართველოს მასშტაბით მისი მკურნალობა, შემდგომი დიაგნოსტიკა და საერთოდ, რაიმე სახის პროგრესი ჯანმრთელობის მდგომარეობაში – წარმოუდგენელად მიგვაჩნია” – მარიამ ჯიშკარიანი მიხეილ სააკაშვილზე

საქართველოს მე-3 პრეზიდენტის ორგანიზმში აღმოჩენილი მძიმე მეტალების რაოდენობა და კონცენტრაცია მიუთითებს იმაზე, რომ მიხეილ სააკაშვილი მოწამლულია უცნობი ნაერთით.

აღნიშნული ინფორმაცია ჟურნალისტებთან გააჟღერა წამების მსხვერპლთა ფსიქოლოგიური რეაბილიტაციის ცენტრ ,,ემპათიას“ დირექტორმა მარიამ ჯიშკარიანმა:

,,იმ მეტალებთან, რომლებიც იქნა აღმოჩენილი, დიდი ალბათობით, პირდაპირ მიუთითებს ინტოქსიკაციაზე. თუმცა, ამდენი მეტალის აღმოჩენა მცირე რაოდენობით, შესაძლებელია ვივარაუდოთ, რომ ადგილი გვაქვს რაღაც ნაერთთან, რომელიც ჩვენთვის უცნობია.

შესაბამისად, საქართველოს მასშტაბით მისი მკურნალობა, შემდგომი დიაგნოსტიკა და საერთოდ, რაიმე სახის პროგრესი ჯანმრთელობის მდგომარეობაში – წარმოუდგენელად მიგვაჩნია.

თვითონ ,,ვივამედის“ კლინიკას აქვს ჩატარებული ტოქსიკოლოგიური კვლევა გერმანიაში. იქ არის აღმოჩენილი სისხლში ძალიან მცირე რაოდენობით, პრაქტიკულად, 4-ვე მეტალი. ეს არის – ვერცხლისწყალი, დარიშხანი, ასევე ტალიუმი და ტყვია“, – განაცხადა მარიამ ჯიშკარიანმა.

ავტორი
ნინი ხიჯაკაძე