“ბექაურისა და დღევანდელი პოლიტიკური სისტემის პირობებში არის საფრთხე, რომ ეს ახალი ჩანაწერები გამოყენებულ იქნას მედიის შევიწროებისა და შინაარსში ჩარევისთვის” – ნინო ჯანგირაშვილი

საქართველოს პარლამენტში დღეს გაიმართა შეხვედრა, სადაც მედიის მიმართ ახალ რეგულაციებს განიხილავდნენ. პარლამენტის დარგობრივი, ევროპასთან ინტეგრაციისა და ადამიანის უფლებათა დაცვის კომიტეტებმა პირველი მოსმენით მხარი დაუჭირა უმრავლესობის მიერ ინიცირებულ კანონპროექტს. აღნიშნულ საკითხზე კრიტიკულ კომენტარს აკეთებს ტელეკომპანია ,,კავკასია“-ს გენერალური დირექტორი ნინო ჯანგირაშვილი:

,,მთავარი პრობლემა და უმთავრესი არის ის, რომ არანაირი კონსულტაცია მედიასთან, დაინტერესებულ მხარეებთან, არასამთავრობო ორგანიზაციებთან არ ყოფილა, ისე შემოვიდა კანონპროექტი.

იმდენი ბუნდოვანი ჩანაწერია ამ კანონში, იმდენი ვითომ კეთილი მიზნებით და ვითომ ევროპასთან ინტეგრაციით ჩაწერილი საფრთხის შემცველი მუხლებია, რომ ამას სჭირდება ძალიან ფართო განხილვა. რაც ამოსაღებია, უნდა ამოვიღოთ. ამას სჭირდება მუშაობა, რაზეც ხელისუფლება ჯერ-ჯერობით არ წამოსულა.

ბექაურისა და დღევანდელი პოლიტიკური სისტემის პირობებში არის საფრთხე, რომ ეს ახალი ჩანაწერები გამოყენებულ იქნას მედიის შევიწროებისთვის და შინაარსში ჩარევისთვის“, – განაცხადა ნინო ჯანგირაშვილმა.

ავტორი
ნინი ხიჯაკაძე