ამერიკის მიერ სანქცირებულთა სიაში შესაძლოა საქართველოს ხელისუფლების წარმომადგენლები აღმოჩნდნენ. შეერთებული შტატების საერთაშორისო განვითარების სააგენტომ (USAID) გამოაქვეყნა დოკუმენტი, სადაც საუბარია საქართველოში არსებულ კორუფციაზე. აღნიშნულ განცხადებაზე კრიტიკული კომენტარი გააკეთა პარლამენტის საპროცედურო საკითხთა და წესების კომიტეტის თავმჯდომარემ ირაკლი ქადაგიშვილმა:
,,მე არ ვიცი ეს რა ჯგუფი და რა სამუშაო ჯგუფი არის. გინდა USAID-ის იყოს და გინდა მარსის. ეს არის აბსოლუტურად მიკერძოებული, პოლიტიკურად ანგაჟირებული განცხადება.
ეს არის აბსოლუტურად ტყუილზე და გარკვეულ პოლიტიკურ, ასე ვთქვათ, ბინძური მიზნებისათვის გამოყენებული რაღაცა ჯგუფის განცხადება.
რა ინტერესი შეიძლება ჰქონდეს ამ განცხადების გამკეთებელს?! – არ ვიცი. ან საქართველოს კანონები არ წაუკითხავს, ან საქართველოს სახელმწიფო ინსტიტუტები არ გაუგია, ან სასამართლო პრაქტიკა არ მოუსმენია?!“, – განაცხადა ირაკლი ქადაგიშვილმა
ინფორმაციისთვის, ამერიკის შეერთებული შტატების საერთაშორისო განვითარების სააგენტოს USAID-ის განცხადებაში საუბარია საქართველოს შესახებ ქვეყანაში არსებული კლეპტოკრატიისა და კორუფციის გამომწვევ შედეგებზე:
,,თუკი შესაძლებლობების ფანჯრები იხურება, პოლიტიკური ანალიტიკოსები იაზრებენ როგორ და რისთვის იბრუნებენ ანტირეფორმული ელემენტები ძალაუფლებას. შეფასებები უნდა მოიცავდეს აშშ-ის უფრო მკვეთრ ინტერვენციებს, რომლებიც ხელს შეუწყობს რეფორმების მიღწევების დაცვას და რეჟიმის პასუხისმგებლობის დაკისრებას.
ასეთი ინსტრუმენტები შესაძლოა გულისხმობდეს საგარეო დახმარების გაყინვას მზარდი კორუმპირებული მთავრობებისთვის, უფრო მძლავრი სახალხო დიპლომატიის წარმოებას და მაღალი დონის კორუმპირებული ჩინოვნიკების წინააღმდეგ სანქციების დაწესებას.
ასეთი დახურული შესაძლებლობების მაგალითია საქართველოში არსებული კლეპტოკრატიისა და კორუფციის გამოწვევი შედეგი. ,,საერთაშორისო გამჭვირვალობა საქართველოს“ შეფასებაზე დაყრდნობით, რომელიც გულისხმობს ოლიგარქის მიერ სახელმწიფოს მიტაცების ფაქტს, ფარულ ბიზნეს-გარიგებებს რუსეთში, საქართველოს ეკონომიკის მზარდ დამოკიდებულებას რუსეთის ეკონომიკაზე და კორუმპირებული თანამდებობის პირთა დაუსჯელობას“, – ნათქვამია USAID-ის განცხადებაში.
ავტორი
ნინი ხიჯაკაძე
