“იდეა და შეთავაზება უნაკლოა, არაფერი დაეწუნება ამ წესს” – მიხეილ სარჯველაძე

პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე მიხეილ სარჯველაძე განცხადებას აკეთებს სახალხო დამცველის არჩევის ახალ წესსა და აღნიშნულ საკითხზე ოპოზიციური პარტიების შეფასებებზე. აქვე საპარლამენტო უმრავლესობის წევრი კონკრეტული არასამთავრობო ორგანიზაციის მიმართა აფიქსირებს თავის კრიტიკულ პოზიციას:

,,ოპოზიცია როდესაც საუბრობს ნაღმებზე და კონკრეტულად ვერც მიუთითებს რა ნაღმებზეა ლაპარაკი – ეს მე მგონია მხოლოდ და მხოლოდ სპორტული ინტერესით განპირობებული ამოცანაა, რომ რაღაცნაირად უნდა გააკრიტიკონ. ამ შემთხვევაში იდეა და შეთავაზება, რომელიც უნაკლოა. არაფერი დაეწუნება ამ წესს, რომელიც ჩვენ შევთავაზეთ.

როდესაც საუბრობენ სოლიდარობაზე ორგანიზაციისა ან კონკრეტული პირებისა, რომლებმაც თვითონ წაშალეს ყოველგვარი ზღვარი პოლიტიკურ ორგანიზაციასა და სამოქალაქო საზოგადოებას შორის, რასაკვირველია, რომ ასეთი ორგანიზაცია ვერ ჩაითვლება ვერცერთ შემთხვევაში ნეიტრალურ და მიუკერძოებელ სუბიექტად“, – განაცხადა მიხეილ სარჯველაძემ.

ინფორმაციისთვის: განიხილება არასამთავრობო სექტორის და აკადემიური წრეების ჩართულობით სამუშაო ჯგუფის დააკომპლექტება, ჯგუფი შეარჩევს და მინიმუმ 7 კანდიდატურას წარუდგენს საკანონმდებლო ორგანოს, მათგან კი პარლამენტი ერთ კანდიდატს აარჩევს. აქვე აღსანიშნავია, რომ საპარლამენტო უმრავლესობის განცხადებით, მმართველ პარტიას საკუთარი კანდიდატურა არ ეყოლება.

ავტორი
ნინი ხიჯაკაძე