საქართველოს შინაგან საქმეთა მინისტრი ვახტანგ გომეური ჟურნალისტებთან პირველ კომენტარს აკეთებს სახელმწიფო უსაფრთხოების სამსახურის უფროსის ყოფილი მოადგილის, სოსო გოგაშვილის საქმესთან და მის მიერ წაყენებულ ბრალდებებთან დაკავშირებით. გომელაურის განცხადებით, მას არანაირი კომუნიკაცია და მუქარის მცდელობა არ განუხორციელებია ბრალდებულის მიმართ:
,,ეს, რა თქმა უნდა, აბსურდია, ტყუილია. არანაირი კავშირი არ შემდგარა. ვინც მე მიცნობს პირადად, არა მარტო ჩემ ოჯახს, ნაცნობებს, თუნდაც მტრის ოჯახსაც პატივს ვცემ.
სოსო გოგაშვილი, ძალიან სამწუხაროა, გული მწყდება…
რომ გავიცანი 2013 წელი იყო, წამოვიყვანე მე პირადად. ის იყო რიგით თანამდებობაზე გენინსპექციაში. მე მაშინ ვიყავი ბატონი ირაკლი ღარიბაშვილის მოადგილე, ვთხოვე მას და ჩემს საკურატუროში გადმოვიყვანე, დავაწინაურე. ბოლოს გახდა ჩემი პირველი მოადგილე თითქმის 3 წელი. ის იყო ჩემი ოჯახის ახლობელი, დავახლოვდით ოჯახებით.
ახლა ის აცხადებს, სამწუხაროდ, რომ თურმე 3 წელი იდგა და აგროვდება ჩემზე, ჩვენ გუნდზე კომპრომატებს, თურმე გომელაური ციხეში უნდა იჯდეს და ა.შ.
2018 წელს მოხდა მისი გათავისუფლება თანამდებობიდან. რატომ მოხდა ეს, თვითონ ძალიან კარგად იცის. არაერთხელ დამიცვია ის გუნდისგან.
რაც შეეხება საპატიმროში მის მონახულებას, როგორც ვიცი განცხადება გააკეთა იუსტიციის მინისტრმა, სრულიად კანონის დაცვით მოხდა ახლობლების შეშვება. გამომძიებელს კანონით აქვს უფლება ერთჯერადად დაუშვას ესა თუ ის პიროვნება პატიმართან შეხვედრაზე.
ყველაზე მეტად გაოცებული მე ვარ. მე არავის არ ვაყვედრი არაფერს, რაც შემეძლო ყველაფერი გავუკეთე. ეს ადამიანი იყო დაბალ თანამდებობაზე, არაფერი არ ჰქონდა, გახდა პირველი მოადგილე და როგორც არის ღმერთმა მისცეს, კარგად იყოს. არანაირი ცუდი არ მინდა მისი ოჯახისთვის. სადამდეც მიიყვანა მისმა საქციელმა და ქმედებებმა კი ვხედავთ ახლა.
არ დამირეკავს, არ შემდგარა არანაირი კომუნიკაცია, მუქარა, მით უმეტეს, ოჯახის ამოწყვეტის – სასაცილოა.
მე მზად ვარ, თუ კითხვები იქნება პასუხი გავცე გამოძიებას“, – განაცხადა ვახტანგ გომელაურმა.
ავტორი
ნინი ხიჯაკაძე
