პარტია ,,დროას“ თავმჯდომარე ელენე ხოშტარია პარტიის ოფისში გამართულ საგანგებო ბრიფინგზე განცხადებას აკეთებს ევროკავშირის მიერ 10 აგვისტოს გამოქვეყნებულ ანგარიშზე, საქართველოსთან მიმართებაში და მწვავე, კრიტიკულ შეფასებას აკეთებს მმართველი გუნდის მიმართ:
,,საზოგადოებას მინდა ვაცნობო, რომ 10 აგვისტოს გამოქვეყნდა ასოცირების ხელშეკრულების შესრულების ანგარიში, რაც არის ერთ-ერთი ფუნდამენტური დოკუმენტი, ჩვენ ურთიერთობაში ევროკავშირთან.
გარდა დღევანდელი კონტექსტისა, ასოცირების ჩარჩო – ეს არის ის ჩარჩო, რომელმაც ჩვენ მოგვიტანა არაერთი უკვე შემდგარი სიკეთე ევროკავშირისგან, როგორიც არის უვიზო მიმოსვლა, ვაჭრობა ევროკავშირთან. ამაზე არის დაკავშირებული ჩვენი ყველა მოქალაქის კეთილდღეობა.
კანდიდატის სტატუსის საკითხისა და უკრაინაში ომიდან გამომდინარე, ამ ანგარიშმა კიდევ უფრო დიდი მნიშვნელობა შეიძინა, პრაქტიკულად შეგვიძლია ვთქვათ, რომ განსაზღვრავს ევროკავშირის კანდიდატობის მიღების მხრივ ჩვენს პერსპექტივას.
ევროკომისიის რეკომენდაციებიდან გასულია თითქმის 2 თვე და ჩვენ ვკითხულობთ ანგარიშს, რომელშიც არა თუ პროგრესი, არამედ მთელი ფუნდამენტური მიმართულებით გვაქვს სერიოზული ჩავარდნები. უარყოფითად ფასდება 2020 და 2021 წლები არჩევნები; ლაპარაკია პოლიტიკურ მართლმსაჯულებაზე – იმ პრობლემაზე, რომელიც თან სდევს ,,ქართულ ოცნებას“; კონკრეტულად საუბარია როგორც ნიკა გვარამიას პატიმრობაზე, ასევე მიხეილ სააკაშვილის უფლებების შელახვაზე; პოლიტიკური მართლმსაჯულების გარდა, ასევე საუბარია მართლმსაჯულების სიტემის რეფორმების არარსებობაზე – პირდაპირ, ძალიან მძიმე სიტყვა ,,რეგრესი“ არის მოხსენიებული.
არავის არ აქვს ილუზია, რომ ამ სფეროში რაიმე კეთდება – პირიქით, ჩვენ გვეუბნებიან, რომ გვაქვს სერიოზული უკუსვლა; საუბარია ასევე მედია გარემოზე და ჟურნალისტების უსაფრთხოების, უფლებების შელახვაზე…
ლაპარაკია ომბუდსმენის ინსტიტუტზე თავდასხმაზე, ფარულ მოსმენებზეც, მათ შორის, დიპლომატების მიმართ, რაც ჩვენი ქვეყნისთვის არის კატასტროფული სკანდალი.
ამ ანგარიშით კიდევ ერთხელ გამოჩნდა, რომ ,,ქართული ოცნების“, ოლიგარქიის პირობებში საქართველოს არ გააჩნია ევროპული პერსპექტივა. ჩვენ ვიცით რა გვაქვს გასაკეთებელი. ჯერი და ვალი ახლა არის ჩვენზე, რომ ვიმოქმედოთ და გავათავისუფლოთ ქვეყანა ოლიგარქისგან“, – განაცხადა ელენე ხოშტარიამ.
ავტორი
ნინი ხიჯაკაძე
