“ქართული ოცნება” რისკავს საქართველოს რეპუტაციით და ამერიკასთანაც კი არ ერიდებიან ბიძინას ფულის აღების გამო ურთიერთობის გაფუჭებას – პაატა მანჯგალაძე

საქართველოს პარლამენტის წევრი, ,,სტრატეგია აღმაშენებლის“ გენერალური მდივანი პაატა მანჯგალაძე პოზიციას აფიქსირებს საქართველოს ყოფილი პრემიერ-მინისტრის ბიძინა ივანიშვილის დავაზე შვეიცარულ ბანკ ,,Credit Suisse”-თან დაკავშირებით. ოპოზიციონერი ლიდერი ასევე პოლიტიკურად აფასებს ,,ქართული ოცნების“ ქმედებებს აღნიშნულ საკითხთან მიმართებაში:

,,რაც უფრო დრო გავა და ვნახავთ, რომ დასავლელი პარტნიორები აშკარად ეხმარებიან უკრაინას და უკრაინა აღწევს წარმატებას, ირაკლი კობახიძის მდგომარეობა თანდათან დამძიმდება – ვგულისხმობ მის პოლიტიკურ მდგომარეობას.

ეს არის ,,ქართული ოცნების“ ძალიან მძიმე მდგომარეობა. განსაკუთრებით მძიმეა, რომ განცხადებებს აკეთებენ ერთი ერთში რუსეთთან ერთად თანხვედრაში, რომ დასავლელი იმპერიალისტები უბლოკავენ ბიძინას თურმე ფულს, იმის გამო, რომ ბიძინა არ აპირებს თურმე ომს.

ბანკს, რა თქმა უნდა, აქვს დავა ბიძინა ივანიშვილთან, რომელიც მოიგო ივანიშვილმა, სამართლიანობისთვის უნდა ვთქვათ, მაგრამ აქვს ვარაუდი, მე ასე ვუშვებ, რომ შესაძლებელია , ბიძინას ბიზნესის რუსული წარმომავლობიდან გამომდინარე, მოჰყვეს სანქციაში და გადარჩეს იმ ვალდებულებების აღებას, რაც აკისრია ბიძინა ივანიშვილთან.

მხოლოდ ეს კერძო საკითხია, მაგრამ იმის გამო, რომ ბიძინა ივანიშვილმა ფული მიიღოს ,,ქართული ოცნება“ რისკავს საქართველოს რეპუტაციით და იმით, რომ ამერიკასთანაც კი არ ერიდებიან ბიძინას ფულის აღების გამო ურთიერთობის გაფუჭებას“, – განაცხადა პაატა მანჯგალაძემ.

ავტორი
ნინი ხიჯაკაძე