“გადავწყვიტე, რომ ჩემ ცხოვრებას მივუძღვნიდი ბიძინა ივანიშვილის ცხოვრების გამწარებას, სადაც არ უნდა ვიყო, რამდენი ხანიც არ უნდა ვიყო – სახეს ავახევ“ – ნიკა გვარამია

თბილისის საქალაქო სასამართლოში ,,მთავარი არხის“ გენერალური დირექტორის ნიკა გვარამიას სასამართლო პროცესი გაიმართა. პროცესზე, ემოციური სიტყვით გამოსვლისას, ნიკა გვარამიამ  მწვავე პოზიცია დააფიქსირა ,,ქართული ოცნების“ დამფუძნებლის ბიძინა ივანიშვილთან მიმართებაში:

,,ბიძინა ივანიშვილი მეორეჯერ აკეთებს იმას, რასაც აკეთებს ჩემს წინააღმდეგ. ამ ქვეყანაში შეიძლება ბევრმა არ იცის, შეიძლება ბევრმა იცის – ჩემთვის ძალიან მნიშვნელოვანია წესიერება და კეთილსინდისიერება. შეიძლება ბევრი პრობლემა მაქვს, ცუდი თვისებაც, მაგრამ კეთილსინდისიერება და წესიერება ჩემთვის არის ძალიან მნიშვნელოვანი. უკვე მეორეჯერ აღძრა ჩემ წინააღმდეგ საქმე, რომელიც ფინანსურ არაკეთილსინდისიერებას ეხება.

პირველი საქმე, სადაც მე გავმართლდი – 3 თუ 4 დღე ვიყავი, წინასწარი თავისუფლების აღკვეთის იზოლატორში. იმ სამ დღეში გადავწყვიტე, რომ ჩემ ცხოვრებას მივუძღვნიდი ბიძინა ივანიშვილის ცხოვრების გამწარებას, გარდა სხვა დანარჩენისა, რაც მერე კიდევ უფრო მეტად გამოჩნდა – იქ, იმ 3 დღეში მე გადავწყვიტე, რომ ჩემი თავი მსხვერპლად შემეწირა მისი გამწარებისთვის.

ახლა ვეუბნები აქედან, სადაც არ უნდა ვიყო, რამდენი ხანიც არ უნდა ვიყო – სახეს ავახევ. მე მგონი არ დაჭირდება, ამ თვის ბოლომდე უკვე ისედაც ეგრე იქნება. მეც შევიტან ჩემს წვლილს ამაში, აუცილებლად!“, – განაცხადა ნიკა გვარამიამ.

ავტორი
ნინი ხიჯაკაძე