მაცხოვრის აღდგომის ტაძარი და სრულიად მსოფლიო კიდევ ერთხელ გახდა სასწაულის მოწმე. დღეს 23 აპრილს, 15:31 თბილისის დროით, წმინდა ცეცხლის გარდამოსვლა მოხდა.
წმინდა ცეცხლს ჭეშმარიტების ნათელს უწოდებენ, რომელიც სიმბოლურად იესო ქრისტეს აღდგომას განასახიერებს.
სხვადასხვა წყაროებში არსებობს ინფორმაციები იმასთან დაკავშირებით, რომ ერთ-ერთი უძველესი ცნობა წმინდა ცეცხლის გარდამოსვლის შესახებ გვხვდება გრიგოლ ნოსელთან, ევსები კესარიელთან და სილვია აკვიტანელთან, რომლებიც თარიღდება IV საუკუნით, თუმცა მათვე აქვთ მითითებული, რომ არსებობდა ადრეული შემთხვევებიც.
ეკლესიის წმინდა მამების რწმუნებით, პეტრე მოციქულმა საფლავთან მისვლისას გონიერი და სხეულებრივი თვალით ხელთუქმნელი ღვთაებრივი სინათლე იხილა, რომელმაც გაანათა მაცხოვრის საფლავი.
ევსები კესარიელი „საეკლესიო ისტორიაში“ წერს იმის შესახებ, რომ დიდი სააღდგომო ღამისთევისას დიაკვნებს დააკლდათ ზეთი, რის გამოც მთელი ხალხი სასოწარკვეთილებაში ჩავარდა, ხოლო იერუსალიმის პატრიარქმა ნარცის I-მა (185–213) უბრძანა მათ, ვისაც მზადყოფნაში მოჰყავდათ განათება, ჩამოესხათ წყალი და მოეტანათ. შემდეგ სილოამის ემბაზიდან კანდელებში წყლის ჩასხმის კურთხევა გასცა. ამ წყალმა მიიღო ზეთის თვისება, ზეციდან ცეცხლი გადმოვიდა და კანდელები აანთო, რომლებიც მთელი ლიტანიობის განმავლობაში არ ჩამქრალა.
მაცხოვრის საფლავი მდებარეობს იერუსალიმში, აღდგომის ტაძარში, რომელიც IV საუკუნეში დედოფალ ელენეს ბრძანებით აშენდა.
აღსანიშნავია, რომ 2020-21 წლებში კორონავირუსის პანდემიის გამო ტაძარში შესვლა შეზღუდული იყო და წელს, მრევლის, მართლმადიდებელი ეკლესიის მოთხოვნით და იერუსალიმის სასამართლოს გადაწყვეტილებით ტაძარში შემსვლელთა რაოდენობა 4000 ადამიანით განისაზღვრა.
