ოკუპირებულ ცხინვალის რეგიონში ჩატარებულ ე.წ. საპრეზიდენტო არჩევნებს, სადაც არჩევნების პირველი ტური წააგო ე.წ. პრეზიდენტმა ბიბილოვმა, ეხმაურება “ლეიბორისტული პარტიის” თავმჯდომარე, შალვა ნათელაშვილი. ოპოზიციონერი ლიდერი ერთგვარ შედარებას აკეთებს ოკუპირებულ რეგიონებში ჩატარებულ არჩევნებსა და შედეგებს, დანარჩენ საქართველოსთან:
“ესაც ბედის დაცინვაა, რომ საქართველოს სეპარატისტული რეგიონები დანარჩენ საქართველოზე მეტად დემოკრატიულად გამოიყურებიან.
დათვალეთ მარტო აფხაზეთში რამდენი ე.წ. პრეზიდენტი და ე.წ. მთავრობა შეიცვალა ე.წ. არჩევნების გზით. აგერ გუშინაც ცხინვალის თვითმარქვია, თანაც მოქმედმა ე. წ. პრეზიდენტმა წააგო პირველი ტური, მაშინ როდესაც მას აქვს ყველა ადმინისტრაციული, ფინანსური ბერკეტი და მოსკოვის მხარდაჭერაც. ჩვენ ვისაც ძალაუფლება და ფული აქვს მისი მრევლობა მოგვესაჯა როგორც სჩანს.
P.S. განსაკუთრებით საოცარია, რატომ აძლევს მოსკოვი ასე თავისუფლად არჩევნების ჩატარების უფლებას მის მიერ დაპყრობილ რეგიონებს? ალბათ იმიტომ, რათა დაგვანახოს, რომ განსხვავებით დანარჩენი საქართველოსგან იქ არ ჩადიან ფულის საშოვნელად ამხედრებული ე.წ. ცნობილი სამეთვალყურეო-სადამკვირვებლო, სარეიტინგო-ეგზიტპოლური და სხვა ყველა ის სუბიექტი, რომლებმაც 30 წელია თავისუფალი არჩევნების უფლება ხალხს წაართვეს.
ესეც იდეოლოგიური ბრძოლაა და აქაც ჯერ-ჯერობით ოკუპანტები გვიგებენ საუბედუროდ,” – წერს ფეისბუქის საკუთარ გვერდზე შალვა ნათელაშვილი.
