მმართველმა გუნდმა ახალი კანონპროექტი მოამზადა, რაც გულისხმობს ამნისტიას იმ დანაშაულებებზე, რომლებიც 2004 წლამდე არის ჩადენილი. აღნიშნულ საკითხზე მწვავე კომენტარი გააკეთა ,,ევროპული საქართველოს” თავმჯდომარემ გიგა ბოკერიამ:
,,აქ არის საფუძვლიან ეჭვზე უფრო მეტი, რომ კონკრეტულად ,,გამორჩეული” ისტორიული ფიგურებისთვის კეთდება ეს და არა ზოგადად ამნისტიისთვის, ზოგადად საზოგადოების რაღაც ჯგუფისთვის, მოქალაქეთა ჯგუფისთვის.
ეს ადამიანები არიან ჩვენს ისტორიაში გამორჩეული ადამიანები, ჩემი და მრავალი მოქალაქის აზრით, არა კარგ მხარეს, არამედ ბოროტების მხარეს, ჩვენი მტრის რუსეთის მხარეს ან უაღრესად კორუმპირებული შევარდნაძის რეჟიმის ბოლო ეპოქის სიმბოლოები და დასახელდნენ – ასლან აბაშიძე, მამალაძე.
ეს ფარისევლობა და მოტივებია სწორედ აღსანიშნავი ამაში და ზუსტად ჯდება ივანიშვილის რეჟიმის ბუნებაში. ამიტომ აქვს წინამძღვრად აღებული ,,ვარდების რევოლუციის” შემდეგი პერიოდი.
მე არ მიყვარს, რაც არ ვიცი იმაზე ვარაუდები, მაგრამ ვერ გამოვრიცხავ ვერაფერს, დაწყებულს ,,კომერციული მოტივებით”, დამთავრებულს კიდევ უარესით – ჩვენთვის მტრული ქვეყნის ლობირებით.
ვერ გამოვრიცხავ, არ ვიცი მაგრამ ვერ გამოვრიცხავ!
რაც ვიცი არის ის, რაც მოვისმინეთ ,,ქართული ოცნებისგან” “არგუმენტების” სახით რატომ აკეთებენ ამას – არის სრულიად არადამაჯერებელი!”, – განაცხადა გიგა ბოკერიამ.
ავტორი
ნინი ხიჯაკაძე
