საქართველოს პრემიერ-მინისტრი ირაკლი ღარიბაშვილი, რუსეთ-უკრაინის ომის პერიოდში, ქვეყანაში გამართულ უკრაინის მხარდამჭერ და საპროტესტო აქციებთან დაკავშირებით მწვავე პოზიციას აფიქსირებს და მას ანტისახელმწიფოებრივ ქმედებად მიიჩნევს. მმართველი პარტიის ლიდერი ასევე საუბრობს ქვეყნის მე-3 პრეზიდენტთან მიმართებაში და მას ლაჩარს უწოდებს:
,,სამწუხარო რეალობაა, რომ მთელ მსოფლიოში, არც ერთ ქვეყანაში, ისეთ ვითარებაში, რომელიც ახლა არის უკრაინაში ანუ რუსეთ-უკრაინის ომის დროს არ გამართულა საპროტესტო აქციები და არ მოუთხოვიათ მთავრობის გადადგომა. მით უმეტეს ჩვენი სიტუაცია არის განსაკუთრებული, უნიკალური. ჩვენ ვართ ოკუპირებული. ჩვენი ქვეყნის 20% არის ოკუპირებული და რუსის ჯარი დგას ჩვენს ტერიტორიაზე. ჩვენ ვცხოვრობთ რუსულ ჯართან ერთად. ამ დროს, როცა სიტუაცია არის ძალიან არაპროგნოზირებადი და მოწყვლადი, მთელი რეგიონისა და ევროპის მასშტაბით, რა თქმა უნდა, მიუღებელი და გაუგებარი იყო ის ანტისახელმწიფოებრივი აქციები, რომელიც იმართებოდა.
ყოველივე ეს აბსოლუტურად მიუღებელია და იმ ძალების მიერ იყო ორგანიზებული, რომლებიც წლებია უკვე ატარებენ ანტიეროვნულ, ანტისახელმწიფოებრივ პოლიტიკას, ეს არის მოღალატეობრივი პოლიტიკა, ეს არის მე-5 კოლონა, შულავერის კომიტეტი, რომელიც საქართველოში მოქმედებს, ჩვენ ამას არ დავუშვებთ და ბუნებრივია, ბოლომდე დავიცავთ ჩვენი მოსახლეობის ინტერესებს.
ჩვენ, სამწუხაროდ, გვახსენდება აგვისტოს ომის დროს გმირობის არაერთი მაგალითი ჩვენი გმირების, ჩვენი ჯარისკაცების. უპრეცედენტო გმირობა გამოიჩინეს ჩვენმა სამხედროებმა, მაშინ. ასევე, უპრეცედენტო ლაჩრობა გამოიჩინა ყოფილმა მთავარსარდალმა სააკაშვილმა, რომელმაც სიმხდალის, ლაჩრობის ყველა რეკორდი მოხსნა, კაცობრიობის არსებობის მანძილზე. რა თქმა უნდა, ესეც ძალიან კარგად გვახსოვს.
ასე, რომ ადამიანი, რომელმაც ასეთი სიმხდალე ჩაიდინა, მოღალატეობრივი, მისი რადიკალური ჯგუფი დღეს არ უნდა გვასწავლიდეს ჩვენი ქვეყნის სიყვარულს“, – განაცხადა ირაკლი ღარიბაშვილმა.
ავტორი
ნინი ხიჯაკაძე
