პარლამენტის ფრაქცია ,,ქართული ოცნების“ თავმჯდომარემ მამუკა მდინარაძემ პარტიის ოფისში გამართულ შეხვედრაზე განხულულ საკითხზე ისაუბრა. მმართველი გუნდის ერთ-ერთი ლიდერის განცხადებით, მთავარი საკითხები იყო საქართველოსა და უკრაინაში მიმდინარე პოლიტიკური პროცესები და პრეზიდენტის პარლამენტში დაგეგმილი გამოსვლა:
,,მთავარი საკითხები იყო პრეზიდენტი მოხსენება და შინაგან საქმეთა მინისტრის მოსმენა, რომელზეც შევთანხმდით, რომ გაიმართოს 17-ში. ასევე, რა თქმა უნდა, უკრაინის საკითხი, პოლიტიკის საკითხი, რომელიც დღეს ყველაზე აქტუალურია მსოფლიოში თავისი მიმართულებებით, რუსეთის მიერ ღია აგრესიიდან წარმოებული ომით უკრაინაში და პრობლემა, რომელიც სამწუხაროდ უფრო გლობალური ხდება, ვიდრე ეს ვიღაცისთვის ერთი შეხედვით ჩანდა.
ამ სიტუაციაში ჩვენმა ქვეყანამ, თუკი რაციონალიზმის რაიმე ხარისხი არსებობს, უნდა იმოქმედოს მაღალი ხარისხით, აარიდოს ამ ქვეყანას ომი, რომელში ჩათრევასაც ძალიან ცდილობენ ვიღაცები, არ დავკონკრეტდები ამ შემთხვევაში.
ასევე, აარიდოს ის მაქსიმალური რისკები, რაზეც სამწუხაროდ, იღვწიან ჩვენი არაკეთილის მოსურნენი. ამ შემთხვევაში ქვეყნის შიგნით არსებულ ძალებს ვგულისხმობ, რომლებიც ამას აკეთებენ არა მხოლოდ ქვეყნის შიგნით როგორც აქამდე, არამედ ქვეყნის გარეთაც“, – განაცხადა მამუკა მდინარაძემ.
ავტორი
ნინი ხიჯაკაძე
