ჰელსინკის კომისია მოუწოდებს ჯო ბაიდენის ადმინისტრაციას უკრაინა და საქართველო NATO-ს არაწევრ ძირითად მოკავშირეებად აღიაროს. აღნიშნულ განცხადებაზე პოლიტიკურ შეფასებას აკეთებს პარლამენტის პირველი ვიცე-სპიკერი გიორგი ვოლსკი და აცხადებს, რომ ჰელსინკის კომისია ყოფილი პოლიტიკოსების, ექსპერტების და მოქმედი პოლიტიკოსებისგან შედგება, რაც მათი განცხადების სერიოზულობაზე მეტყველებს:
,,ჰელსინკის კომისია არის აშშ-ის მთავრობის ოფიციალური სააგენტო. მასში გაერთიანებული არიან ყოფილი პოლიტიკოსები, ექსპერტები და მოქმედი პოლიტიკოსები. აქედან გამომდინარე, უნდა ვიმსჯელოთ ამ განცხადების, ამ მიმართვის სერიოზულობაზე.
დღეის მდგომარეობით საქართველო არის საგანგებო სტატუსის მქონე პარტნიორი NATO-თვის. ეს არა ერთხელ განმტკიცდა უკვე კონკრეტულ ოპერაციებში მონაწილეობის თვალსაზრისითაც, მათ შორის, – პოზიციები საშინაო თუ საგარეო საკითხებზე.
რაც შეეხება საქართველოს ძირითადი მოკავშირის სტატუსს NATO-თვის ეს, რასაკვირველია, არავისთვის ეჭვს არ წარმოადგენს, რომ დღეს მაგალითად, ოპერაციებში მონაწილეობის, საგარეო პოლიტიკური კურსის თვალსაზრისით არის ის დონე, რომელიც არაწევრ ქვეყნებში მსოფლიოში დღესდღეობით არავის არ გააჩნია თუ არა – საქართველოს.
თუმცა ამის ფორმალიზებაზეა საუბარი, რაზეც ჰელსინკის კომისიის განცხადებაშია საუბარი. რამაც კიდევ დამატებითი რესურსი უნდა შეგვძინოს უსაფრთხოების და ეკონომიკური რესურსების მობილიზაციის თვალსაზრისით“, – განაცხადა გიორგი ვოლსკიმ.
ინფორმაციისთვის: ჰელსინკის კომისია აშშ პრეზიდენტის, ჯო ბაიდენის ადმინისტრაციას მიმართავს და მოუწოდებს, რომ უკრაინას და საქართველოს, რომლებსაც არ აქვთ საკმარისი უსაფრთხოების გარანტიები დასავლეთისგან, ამასთან ისინი დგანან რუსული ოკუპაციისა და საფრთხეების წინაშე, უნდა მიენიჭოთ ნატო-ს არაწევრი მთავარი მოკავშირის სტატუსი. კომისია ამასთანავე მოუწოდებს, რომ აშშ-მა უფრო აქტიური პოზიცია უნდა დაიკავოს საქართველოსა და უკრაინის ნატო-ში გაწევრიანების საკითხზე.
ავტორი
ნინი ხიჯაკაძე
