,,სტრატეგია აღმაშენებლის” გენერალური მდივანი, საქართველოს პარლამენტის წევრი, პაატა მანჯგალაძე ტვ ,,პირველის” ეთერში, გადაცემაში “დღის ამბები” მწვავე შეფასებას აკეთებს და კრიტიკას გამოთქვამს პრემიერ-მინისტრ ირაკლი ღარიბაშვილის კომენტარზე საქართველოს პოზიციის დაფიქსირებისას უკრაინასთან მიმართებაში:
,,პრემიერ-მინისტრი დღეს იყო ძალიან სამარცხვინო და ანტისახელმწიფოებრივი – პირდაპირ შემიძლია ვთქვა.
პანდემიას ეგენი არ ებრძვიან, ეკონომიკას ვერ ავითარებს, სამუშაო ადგილებს ვერ ქმნის, სოციალურ პრობლემებს ვერ აგვარებს, რა საქმე აქვს ახლა პრემიერ მინისტრს ისეთი, რომ ვერ მოიცალოს უკრაინის თემატიკასთან დაკავშირებით?!
მეორე – ძალიან აბსურდული განცხადება გააკეთა, თან მიდიხარ იუნკრების საფლავთან, ძალიან მნიშვნელოვანი დღე არის ჩვენთვის. ეს გამოცდილება ნუთუ დაგვავიწყდა. იუნკრების საფლავთან ხარ და ამჟღავნებ იქიდან სილაჩრეს, ასე ვთქვათ პირდაპირ. იყო ადამიანები იმ ომის დროსაც, ამბობდნენ, რომ რა ხდებაო კოჯორშიო კაცო, არ დამაძინეს მთელი ღამეო, წავიდნენ და ასეთი ადამიანების ძეგლი გააკეთონ და იქ მივიდნენ და იმათ საფლავებზე იარონ მაშინ. რა უფლებით მივიდა იუნკრების საფლავზე, რომელმაც თავი დადო საქართველოს თავისუფლებაზე.
ჩვენ არა ვართ ომის პარტია. უნდათ, რომ ოპოზიცია წარმოაჩინონ, თითქოს ჩვენ ომი და არეულობა გვინდა ქვეყანაში და ესენი არიან მშვიდობის მხარეს.
რუსეთი მოდის განადგურებისთვის, რა არჩევანი გვაქვს?! არჩევანი გვაქვს მოვემზადოთ და ვიყოთ ცივილიზებულ სამყაროსთან ერთად, ან მეორე არჩევანი, რასაც გვთავაზობს ,,ქართული ოცნება” – ვიყოთ ჩირგვებში, მოვიტყუოთ თავი, ვიყოთ პუტინის ნების ამარა დაველოდოთ, რომ შეგვიწყალებენ და გადაგვისვამენ თავზე ხელს.
აი ეს ორი არჩევანია სინამდვილეში – სიმართლე ვუთხრათ ადამიანებს. აი ასეთი სამარცხვინო ხელისუფლება გვყავს ჩვენ დღეს და სინამდვილეში სახელმწიფოებრივი რა არის? სახელმწიფოებრივი არის ის, რომ სინამდვილეში დღეს პარლამენტში უნდა მოსულიყვნენ, დაგვეფიქსირებინა ყველას ერთიანობა, რომ რუსის ტანკს, რუსის ჩექმას საქართველოში არავინ არ ელოდება. არავინ არ ელოდება თეთრი დროშებით, ეს დაგვეფიქსირებინა ყველას და გვეთქვა, რომ დიახ უკრაინაში არის ჰუმანიტარული კატასტროფა, რასაც აკეთებს რუსეთი.
მხოლოდ ამის განცხადებების გაკეთება გვინდოდა, მაგრამ ისინი იძახიან – ,,ნაციონალური მოძრაობა”, ყველაფერზე. ვინმე მივიდეს ჩიპი მაინც გამოუცვალოს ამ სპიკერებს კაცო, რაღა დროს ,,ნაციონალურ მოძრაობაზე” ლაპარაკია, ინგრევა ქვეყანა ხო?!
ელემენტარული საკითხია. მაგალითი სახელმწიფოებრიობის რა არის? ზელენსკი როცა არის პრეზიდენტის კვარტალში, პოროშენკო რომელიც არის დაპირისპირებული მასთან, თუმცა ავტომატით დგას და იცავს უკრაინას. ზელენსკის კი არა, უკრაინას იცავს პირველ რიგში და მათ შორის ზელენსკისაც.
ეს არის სახელმწიფოებრიობივი აზროვნება და ასე უნდა გავზარდოთ ხალხი და არა საჩივარზე გამოყრილი ეს ,,ქართული ოცნების” წარმომადგენლები, რომლებიც სამარცხვინო განცხადებებს აკეთებენ და რომ ვიძახით ვიღაცა ჭინკებზე, რომ ვლაპარაკობთ, იმაზე სამარცხვინო არიან ეს ადამიანები დღევანდელი განცხადებებით”, – განაცხადა პაატა მანჯგალაძემ.
ავტორი
ნინი ხიჯაკაძე
