პარლამენტის რუსთავი-გარდაბნის მაჟორიტარი დეპუტატობის კანდიდატი, პარტია “ლელო საქართველოსთვის” გენერალური მდივანი, ბადრი ჯაფარიძე “პატრიოტთა ალიანსის” ლიდერ ირმა ინაშვილის დამოკიდებულებაზე რუსეთთან მიმართებაში და ასევე მათ გუშინდელ შეხვედრასთან დაკავშირებით აკეთებს კომენტარს:
“პარტია “ლელო საქართველოსთვის” პოზიცია არის ცალსახა, საქართველოს ინტეგრირება ევროატლანტიკურ სტრუქტურებში უნდა დაჩქარდეს, რასაც ხელს უშლის “ქართული ოცნების” ნაბიჯები – ეს არის ჩვენი პოზიცია. შესაბამისად, ნებისმიერ სხვა პოზიციას არ ვიზიარებ, მაგრამ ადამიანებს აქვთ უფლება ჰქონდეთ ნებისმიერი შეხედულება. ამის გამო არ უნდა შეიძულო ადამიანი, ამის გამო არ უნდა გაწყვიტო მასთან კონტაქტი.
გუშინდელ ჩვენ შეხვედრაზე მე მომეცა საშუალება მეთქვა მისთვის იმ უმსგავსო ქმედებაზე, რომელიც “ქართულმა ოცნებამ” ჩემთან მიმართებაში გამოავლინა – პოლიტიკური დევნის დეტალები.
ირმას შეხედულება რუსეთთან მიმართებაში ცნობილია, რომელსაც მე არ ვიზიარებ და არც არანაირი თანხვედრა ამ საკითხზე არ გვქონია და არც გვექნება,”- აცხადებს ბადრი ჯაფარიძე.
