საქართველოს პრემიერ-მინისტრმა, ირაკლი ღარიბაშვილმა ოფიციალურად წარადგინა ჯანდაცვის ახალი მინისტრი ზურაბ აზარაშვილი, კონკრეტული შეფასებები გააკეთა მასთან მიმართებაში და წარმატებები უსურვა ახალ პოსტზე:
,,მოგეხსენებათ, რომ ქალბატონი ეკა ტიკარაძე გადადგა დაკავებული თანამდებობიდან. მე მინდა, პირველ რიგში მას გადავუხადო მადლობა გაწეული საქმიანობისთვის და ვუსურვო წარმატებები.
დღეს წარმოგიდგენთ ახალ მინისტრს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრს – ბატონ ზურაბ აზარაშვილს.
ბატონი ზურა გახლავთ ბიზნეს ადმინისტრირების მაგისტრი, მას აქვს ძალიან დიდი გამოცდილება ფინანსების მართვის, არის ძალიან კარგი, ძლიერი მენეჯერი. ჩვენ თავად გამოვცადეთ და დავრწმუნდით ამაში, მე როცა ვიყავი თავდაცვის მინისტრი. ბატონი ზურა მაშინ იყო ,,დელტას“ ხელმძღვანელი, ასევე ,,თბილ ავია მშენის“ ხელმძღვანელი. მისი უშუალო ხელმძღვანელობით განხორციელდა არაერთი მნიშვნელოვანი პროექტი, როგორიც არის საქართველოს ავიაციის აღდგენა, უამრავი სხვა პროექტი, რომელიც უკავშირდება ჩვენი თავდაცვის ძალების გაძლიერებას და ა.შ.
ბატონი ზურა უაღრესად წესიერი, განათლებული ადამიანი. იგი არის გაზრდილი ექიმის ოჯახში. მას, რა თქმა უნდა, კარგად აქვს გაცნობიერებული ის გამოწვევა, რომელიც დღეს ჩვენი მოსახლეობის წინაშეა.
მე მინდა ზურას წარმატება ვუსურვო. იგი არის 5 შვილის მამა და მე ვფიქრობ, რომ ბატონი ზურა იქნება ძალიან წარმატებული მინისტრი.
აქვე მინდა აღვნიშნო, რომ თუ რაოდენ დიდი მნიშვნელობა აქვს უზარმაზარი სამინისტროს მართვაში ასეთი გამოცდილი კადრის მინისტრად დანიშვნას.
მოგეხსენებათ, რომ მთელი სამინისტროს ბიუჯეტი არის დაახლოებით 6 მლრდ ლარი. ეს არის მთლიანი ბიუჯეტის თითქმის 1/3. ბუნებრივია, ჩვენ ამ მიმართულებით გამოცდილი კადრი გვჭირდებოდა. მე ვფიქრობ, რომ ასეთი არის ბატონი ზურა“, – განაცხადა ირაკლი ღარიბაშვილმა.
ავტორი
ნინი ხიჯაკაძე
