“მტკიცედ გვჯერა, რომ სწორედ ნატოს გაფართოება აღმოსავლეთისკენ და საქართველოს ნატო-ში წევრობა არის სტაბილურობის და უსაფრთხოების გარანტია ევროპაში” – “სტრატეგია აღმაშენებელი”

რუსეთის საგარეო საქმეთა სამინისტროს მოთხოვნას – მოხდეს ოფიციალური დეზავიურება 2008 წლის ნატოს ბუქარესტის სამიტის გადაწყვეტილების იმ ნაწილის, სადაც აღნიშნულია, რომ “უკრაინა და საქართველო გახდებიან ნატოს წევრები”, ეხმაურება და მწვავე შეფასებას აძლევს პოლიტიკური პლატფორმა “სტრატეგია აღმაშენებელი”:

“რუსეთის ფედერაცია ამ განცხადებით კიდევ ერთხელ არღვევს საერთაშორისოდ აღიარებულ ფუნდამენტურ პრინციპებსა და ნორმებს!

რუსეთი კიდევ ერთხელ ხელყოფს ჩვენს სუვერენიტეტს, რამდენადაც საქართველოს ევროპული და ევრო-ატლანტიკური მისწრაფება არის ქართველი ხალხის არჩევანი და ნებისმიერი მცდელობა, გავლენის სფეროების დაკანონების, უპირისპირდება როგორც საერთაშორისოდ აღიარებულ სუვერენიტეტის პრინციპს, ასევე ჩვენს საგარეო პოლიტიკურ არჩევანს.

მიგვაჩნია, რომ სწორედ რუსეთის რევიზიონისტული საგარეო პოლიტიკა უქმნის ევროპულ უსაფრთხოებას საფრთხეს.

საქართველოს წინააღმდეგ 2008 წლის აგვისტოს ომი, ოკუპირებული რეგიონების ე.წ. დამოუკიდებლობის აღიარება, განგრძობითი რუსული ოკუპაცია და ოკუპირებული რეგიონების მილიტარიზაცია, ისევე როგორც 2014 წელს ყირიმის ანექსია და უკრაინის წინააღმდეგ წარმოებული ჰიბრიდული ომი, საფრთხეს უქმნის ეროპულ უსაფრთხოებასა და წესებზე დაფუძნებულ საერთაშორისო ნორმებს.

მტკიცედ გვჯერა, რომ სწორედ ნატოს გაფართოება აღმოსავლეთისკენ და საქართველოს ნატო-ში წევრობა არის სტაბილურობის და უსაფრთხოების გარანტია ევროპაში” – აცხადებს პარტია “სტრატეგია აღმაშენებელი”.

ინფორმაციას პოლიტიკური პლატფორმა “გიორგი ვაშაძე – სტრატეგია აღმაშენებლის” მედიასთან და საზოგადოებასთან ურთიერთობის სამსახური ავრცელებს