პოლიტიკური პლატფორმა “სტრატეგია აღმაშენებლის” გენერალური მდივანი, დეპუტატი პაატა მანჯგალაძე პარლამენტის მიერ მიღებული საარჩევნო კოდექსის შეფასებას ახდენს. მისი აზრით, კოდექსში შეტანილი ცვლილებებით მნიშვნელოვნად შემცირდება გაყალბების რისკები:
“გუშინ მიღებულ იქნა მნიშვნელოვანი ცვლილებები საარჩევნო კოდექსში, რომელიც სხვადასხვა ტექნოლოგიის გამოყენებით მინიმუმამდე დაიყვანს ადამიანური ფაქტორით გამოწვეულ გაყალბების რისკებს, შეიცვალა ასევე ადმინისტრაციის დაკომპლექტების პრინციპი, რომლითაც 3700 უბანზე 12 კომისიის წევრიდან 10 წევრი ჰყავდა „ქართულ ოცნებას“.
მნიშვნელოვანია ცვლილება, რომელიც შემაჯამებელი ოქმის შესწორებას ეხება. ადრე ნებისმიერი საბაბით ახსნა-განმარტებით შესაძლებელი იყო მასში ცვლილების შეტანა შემაჯამებელ ოქმში, განხორციელებული ცვლილებით ოქმში უზუსტობის შემთხვევაში შესწორება შესაძლებელია გადათვლის შემდეგ ფაქტობრივი მონაცემების საფუძველზე.
ასევე, ცვლილება ითვალისწინებს 10% საარჩევნო უბნების სავალდებულო წესით შემთხვევითი გადათვლის შესაძლებლობას, გაიზარდა გასაჩივრების ვადები, გამარტივდა გასაჩივრების შესაძლებლობა და დაშვებულია ელ.წესით გასაჩივრება, კომისიებში ყველა გადაწყვეტილების მისაღებად კი დაწესდა მაღალი კვორუმი.
ცვლილება შეეხო სხვა მნიშვნელოვან საკითხებსაც, რომლებიც ხელს შეუწყობს უკეთესი არჩევნების ჩატარების შესაძლებლობას. განხორციელებული რეფორმა ესაჭიროება ქვეყანას და არა რომელიმე პარტიას, სწორედ აქედან მომდინარეობს „სტრატეგია აღმაშენებლის“ მოტივაცია მხარი დაეჭირა ცვლილებებისთვის და ყველა სპეკულაცია ამ მიმართულებით არის უსინდისო უპასუხისმგებლობა“, – აცხადებს პაატა მანჯგალაძე.
