“რას აკეთებთ აქ და რისთვის გიხდით ხელფასს ხალხი?” – სალომე სამადაშვილი საპარლამენტო უმრავლესობას

„26 მაისს 30 წელია აღვნიშნავთ ჩვენი სახელმწიფოს დამოუკიდებლობის აღდგენას, მაგრამ რანაირ სახელმწიფოში ვხვდებით ამ დღეს?“, – კითხვით მიმართა პარლამენტს ოპოზიციის წარმომადგენელმა სალომე სამადაშვილმა. მისი თქმით, შეურაცხმყოფელია მოქალაქეებისთვის პარლამენტის სხდომათა დარბაზში „ოდიოზური სადღეგრძელოების“ მოსმენა, როცა დეპუტატებმა არ იციან, რა პრობლემებია ხალხის წინაშე. მისი თქმით, ორი საქართველო არსებობს – ერთი პარლამენტის დარბაზში და მეორე – მის გარეთ:

„საქართველო, რომელიც არის ჭიათურაში, ბორჯომში, საქართველო, რომელიც იბრძვის გადარჩენისთვის, ის მოქალაქეები, რომლებიც ჩამოვიდნენ თბილისში, რადგან ვერ გაიგეს პასუხი კითხვაზე, რომელიც ჰესის მშენებლობას უკავშირდება. თქვენი პრემიერ-მინისტრი დასცინის და ბნელებს ეძახის მათ, ნაცვლად იმისა, რომ პასუხი გასცეს მათ შეკითხვებს. თქვენგან ითხოვს პასუხს ეს ხალხი. რას აკეთებთ აქ და რისთვის გიხდით ხელფასს ხალხი?“ – მიმართა სალომე სამადაშვილმა სახელისუფლებო გუნდს.

ინფორმაციას ავრცელებს პარლამენტის საზოგადოებასთან ურთიერთობისა და ინფორმაციის დეპარტამენტი