დმანისში ადგილობრივ მაცხოვრებლებს შორის მომხდარ დაპირისპირებაზე პასუხისმგებლობას ოპოზიციის წარმომადგენლები ხელისუფლებას ეკისრებენ. “ევროპული საქართველო – მოძრაობა თავისუფლებისათვის” თავმჯდომარე, გიგა ბოკერია, აღნიშნულ საკითხზე კომენტირებისას აცხადებს, რომ ხელისუფლება დამკვირვებლის როლში იყო და დაპირისპირების გასანეიტრალებლად სათანადო ზომებს არ მიმართა, მაშინ, როცა ბიძინა ივანიშვილის პოლიტიკური და პირადი ინტერესების დასაკმაყოფილებლად ძალებს აქტიურად იყენებს:
“არა თუ დაგვიანებული იყო, სრული, მინიმუმ გულგრილობა და დამკვირვებლის როლში ყოფნა მთელი ამ დროის განმავლობაში.
როცა სხვადასხვა თემის წარმომადგენლები დაიძრნენ ქალაქში, სხვადასხვა ვერსიას ჰყვებიან, მაგრამ ამას თავი დავანებოთ, მთელი ეს პერიოდი სად იყო პოლიცია?! და შემდეგ, როცა ძალადობას ვუყურებდით საათების განმავლობაში, გამშველებლის როლში რატომ უწევდათ პოლიციელებს ყოფნა? ამაში მე ვადანაშუალებ არა იმ პოლიციელებს, არამედ მათ ხელმძღვანელობას, რომლებიც, როცა ივანიშვილის პირად ინტერესს ან მისი გაგებით პოლიტიკურ ინტერესს ეხება საქმე, უზარმაზარ ძალებს იყენებენ“, – აცხადებს გიგა ბოკერია.
ავტორი
ნატალი ბაკურაძე
