საქალაქო სასამართლომ “ერთიანი ნაციონალური მოძრაობის” თავმჯდომარის, ნიკა მელიას საქმის განხილვა დაიწყო. ოპოზიციონერი ლიდერის ადვოკატი, გიორგი კონდახიშვილი აღნიშნულ პროცესს იმიტირებულ სასამართლო პროცესს უწოდებს და აცხადებს, რომ ეს სისხლის სამართლის საქმე მთლიანად პოლიტიკურადაა მოტივირებული:
“მე ამ პროცესს ვუწოდებ ე.წ. იმიტირებულ სასამართლო პროცესს, სადაც რეალურად კანონისა და სამართლის მოთხოვნიდან გამომდინარე არაფერი არ ხდება. ყველაფერი მიმდინარეობს პოლიტიკური მართლწესრიგით.
ჩვენ, იურისტებს ვალდებულება გვაქვს, რა თქმა უნდა, დავიცვათ კანონის მოთხოვნები, გავაგრძელოთ მონაწილეობა აღნიშნულ პროცესში და, რა თქმა უნდა, ყველაფერი გავაკეთოთ ჩვენი მხრიდან, რომ ნიკა მელიას უდანაშაულობა დავამტკიცოთ, თუმცა, ეს ისედაც ცხადია.
ბრალდების შინაარსიც, თვითონ კონკრეტულად ეს სისხლის სამართლის საქმეც არის თავიდან ბოლომდე პოლიტიკურად მოტივირებული და მოგონილი ერთადერთი მიზნით, რომ ნიკა მელიას განეიტრალება მომხდარიყო პოლიტიკურ პროცესებში“, – აცხადებს გიორგი კონდახიშვილი.
შეგახსენებთ, რომ ნიკა მელიას ბრალი 20 ივნისის საქმეზე აქვს წაყენებული. სასამართლო მას ჯგუფური ძალადობის ორგანიზებას ედავება.
ავტორი
ნატალი ბაკურაძე
