საქართველოს განათლების, კულტურის, მეცნიერების და სპორტის სამინისტროს განცხადებით, დისტანციური სწავლა უსაფრთხო და ეფექტიანია. მათი თქმით, უმაღლესმა სასწავლებლებმა შესძლეს ადაპტირება ონლაინ სწავლებასთან, ისე რომ სტუდენტები სასწავლო პროცესში აქტიურად ყოფილიყვნენ ჩართულები. განათლების სამინისტრომ განაცხადა, რომ უნივერსიტეტები ინდივიდუალურად იმუშავებდნენ იმ სტუდენტების საკითხებზე, რომელთაც პანდემიის დროს შეექმნათ ტექნიკური (ინტერნეტისა და კომპიუტერის არქონის პრობლემა) და ეკონომიკური (სწავლის გადასახადის საკითხი) პრობლემები. თუმცა, სტუდენტების გარკვეული ნაწილი საწინააღმდეგოს ამტკიცებს. ისინი აღნიშნავენ, რომ მათი პრობლემებით, არც უნივერსიტეტები და არც განათლების სამინისტრო არ ინტერესდება.
სტუდენტები საუბრობენ, ონლაინ სწავლების დროს შექმნილ პრობლემებზე და აცხადებენ, რომ მათი სრულფასოვანი განათლების მიღების უფლება იზღუდება.
მაღალმთიან აჭარაში მცხოვრები, ილიას სახელმწიფო უნივერსიტეტის სტუდენტი, ვახო აბაშიძე სააგენტო „პარალელთან“ საუბრობს დისტანციური სწავლების უარყოფით მხარეებზე. როგორც მან აღნიშნა, მისი მთავარი მიზანი იყო მიეღო სრულფასოვანი განათლება ბიზნეს ადმინისტრირებისა და მენეჯმენტის სფეროში. ამ მიზნის მიღწევა ვახოს აზრით დისტანციური სწავლების დროს შეუძლებელია. როგორც მან აღნიშნა, ონლაინ სწავლების პროცესში ლექცია-სემინარებს ხშირად ტექნიკური პრობლემების გამო ვერ ესწრება.
„ჩვენთან ხშირად ინტერნეტი ჭედავს, ზოგჯერ შუქიც მიდის. ახლა კი, დაახლოებით 20 დღეში მოთოვს და შემდეგ, კვირაში ერთხელ თუ მოვა ელექტროენერგია“. მისი თქმით, ამ პრობლემების გამო, დისტანციური სწავლების პერიოდში განათლებას ნაკლებ დროს უთმობს. „ონლაინ სწავლების დროს ყველაფერი შეიცვალა. სწავლაზე ხელი ჩავიქნიე. ადრე გაცილებით მეტ დროს ვუთმობდი მეცადინეობას. ამის გამო, სემესტრი სასურველ შედეგზე ვერ დავხურე. თუ ონლაინ სწავლება კიდევ გაგრძელდება, სავარაუდოდ აკადემიურს ავიღებ“. ვახო გვეუბნება, რომ ამ საკითხებზე განათლების სამინისტროსა და უნივერსიტეტს მიმართა, მაგრამ უშედეგოდ. მისი თქმით, ამ პრობლემებიდან მთავარი გამოსავალი – „უნივერსიტეტებში სააუდიტორიო მეცადინეობების აღდგენაა“.
განათლების სამინისტროსა და უნივერსიტეტების განცხადებების მიუხედავად ფაქტია, რომ სტუდენტების გარკვეული ნაწილი ონლაინ სწავლების პროცესში აქტიურად ვერ ერთვება, რაც განპირობებულია ტექნიკური და ეკონომიკური პრობლემებით. მნიშვნელოვანია, როგორც უნივერსიტეტებმა, ისე განათლების სამინისტრომ გაითვალისწინოს სტუდენტების პრობლემები და ახალი მექანიზმები შესთავაზონ მათ.
ავტორი – სააგენტოს ექსპერტი, ანალიტიკოსი
სოფიკო ტაბატაძე
