ელიავას ბაზრობაზე ხანძარი გაჩნდა. წინასწარი ინფორმაციით, ხანძარი გაუჩნდა ხისა და პლასტმასის სასაწყობე შენობას, შედეგად დამწვარია 15-მდე მაღაზია. ზარალის დათვლის პროცესი ჯერ-ჯერობით ისევ მიმდინარეობს. მომხდართან დაკავშირებით, კომენტარს აკეთებს საგანგებო სიტუაციების მართვის სამსახურის, თბილისის მთავარი სამმართველოს უფროსი, ოთარ კერესელიძე:
„ხანძარი ლიკვიდირებულია და დაშავებული არავინ არ არის. სახანძრო და სამაშველო სამსახური, გამოძახებიდან, 6 წუთში იმყოფებოდა ადგილზე. დროულად ლოკალიზდა ხანძარი, რამაც თავიდან აგვარიდა ხანძრის გავრცელების საფრთხე. დაახლოებით, დამწვარია 800 კვადრატი“, – აცხადებს ოთარ კერესელიძე
აღნიშნულთან დაკავშირებით, ასევე ისაუბრა ელიავას ბაზრობის ელექტრო-ინჟინერმა, ჯაბა ლომიძემ. ის ადასტურებს, რომ ელიავას ბაზრობაზე უსაფრთხოების ნორმები დაცული იყო:
„ამ შემთხვევაში, მოკლე ჩართვა არ იქნებოდა, რადგან ელიავას ბაზრობის ტერიტორიაზე ელექტრო ენერგია ითიშება. დირექციამ, მთლიან ტერიტორიაზე შეცვალა ელექტრო გაყვანილობა“, – აღნიშნა ჯაბა ლომიძემ.
მედიასთან საუბრისას, მაღაზიების მეპატრონეები აცხადებენ, რომ მათთვის უცნობია რას უნდა გამოეწვია ხანძრის გაჩენა, რადგან ბაზრობის ტერიტორიაზე ელექტრო ენერგია ითიშება შვიდის ნახევარზე და ჩაკეტილ ტერიტორიაზე ყოფნის უფლება აქვს მხოლოდ დაცვის თანამშრომლებს. მათი განცხადებით, არსებული მაღაზიები დაზღვეულია.
ცნობისთვის, ელიავას ბაზრობაზე ხანძრის გაჩენის ფაქტი არ არის პირველი შემთხვევა. ხანძარი, აღნიშნულ ტერიტორიაზე პირველად 2015 წელს გაჩნდა, ხოლო ყველაზე დიდი ზარალი, ბაზრობამ, 2017 წელს ნახა.
