საქართველოს პრემიერ-მინისტრი, გიორგი გახარია, დღეს გამართულ სხდომაზე დეოკუპაციის საკითხსაც შეეხო. ქვეყნის პირველმა პირმა ჩვენს სტრატეგიულ პარტნიორებს საქართველოს ტერიტორიული მთლიანობის მხარდაჭერისთვის მადლობა გადაუხადა. პრემიერმა, შერიგებისა და სამოქალაქო თანასწორობის საკითხებში სახელმწიფო მინისტრს, თეა ახვლედიანს, ახალი თანამდებობის დაკავება მიულოცა და აღნიშნა, რომ სწორედ მისი მოვალეობაა, მშვიდობიანი მოლაპარაკებისა და შერიგების გზით, ქვეყნის მთლიანობის აღდგენა:
“საქართველოს მთავრობის მთავარი მიზანი ქვეყნის მშვიდობიანი დეოკუპაციაა და გვესმის, რომ ეს პროცესი გადის შერიგებაზე, შრომაზე და საქართველოს კიდევ უფრო მაღალი დემოკრატიული ხარისხის ქვეყნების რანგში გადანაცვლებაზე.
გუშინ გაეროს უშიშროების საბჭოს დახურულ სხდომაზე, საქართველოს სტრატეგიული პარტნიორი ქვეყნების მხარდაჭერით, საქართველოს მდგომარეობა განიხილეს. საკითხი, 12 წლის განმავლობაში, რუსეთის მიერ საქართველოს ოკუპაციას ეხებოდა. საქართველოს ტერიტორიული მთლიანობისა და დეოკუპაციის აუცილებლობა კიდევ ერთხელ, მკაფიოდ დაფიქსირდა.
მსურს, ჩვენს სტრატეგიულ და ევროპელ პარტნიორებს: აშშ-ს, ბელგიას, ესტონეთს, საფრანგეთს, გერმანიას, დიდ ბრიტანეთს, ირლანდიასა და ნორვეგიას მადლობა გადავუხადო უშიშროების საბჭოს დახურულ სხდომაზე მკაფიოდ დაფიქსირებული პოზიციისთვის, რომ საქართველო არის რუსეთის მიერ ოკუპირებული. ჩვენ დეოკუპაციისთვის ყველაფერი უნდა გავაკეთოთ.
დღეს ჩვენს გუნდს შეემატა ახალი წევრი, ქალბატონი თეა ახვლედიანი, შერიგებისა დასამოქალაქო თანასწორობის საკითხებში სახელწიფოს ახალი მინისტრი. მინდა მივულოცო მას ეს საპასუხისმგებლო თანამდებობა.
ამ სამინისტროს ფუნქცია და მოვალეობა, ყველაზე დიდი მისია ჩვენს აფხაზ და ოს ძმებთან შერიგების პროცესის წარმატებით წარმართვა და დასრულება გახლავთ,” – განაცხადა გიორგი გახარიამ.
ავტორი
ეკა ქაჩლიშვილი
