საქართველოს ყოფილი პრეზიდენტი, მიხეილ სააკაშვილი აშშ-ს მხრიდან საქართველოსთან მიმართებაში ბოლო დროს დაფიქსირებულ პოზიციას ეხმაურება და აღნიშნავს, რომ ბიძინა ივანიშვილს დიპლომატიური ენა და ენის ,,მოჩლექვა” არ ესმის:
,,სიმართლეა, რომ ამერიკელებიც და მთლიანად დასავლეთი სულ უფრო კრიტიკულია ბიძინა ივანიშვილის და მისი რეჟიმის მიმართ, მაგრამ მინდა ვთქვა, რომ მაინც გამოიყენება დიპლომატიური ენა და ენის ,,მოჩლექვა”, რომელიც ბიძინა ივანიშვილს და მის ,,დამქაშებს” არ ესმით. ამიტომ, რა თქმა უნდა მე, როგორც ამერიკასთან დიდხნიანი მეგობრობის მქონე ადამიანს, მოველი კიდევ უფრო მკვეთრი პოზიციის ჩამოყალიბებას და ნათლად განმარტებას იმისა, რომ საქმე გვაქვს ბოლომდე კორუმპირებულ, პრორუსულ რეჟიმთან, რომელიც ანადგურებს საკუთარ ხალხს, ჩართულია ათასგვარ საეჭვო კომბინაციაში და ვნებს ქართველი ხალხის ინტერესებსა და მათ შორის ამერიკის და დასავლეთის ინტერესებს ჩვენს რეგიონში – ამას წყალი არ გაუვა!
ბიძინა ივანიშვილს დიპლომატიური ენა არ ესმის, ამიტომ მეც არ ვაპირებ ენის ,,მოჩლექვას” და უნდა ვთქვათ რაც არის: ჩვენ გვჭირდება ამ კრიტიკის გაგრძელება და ყოველგვარი დიპლომატიის გარეშე კიდევ უფრო ზუსტი ფორმულირება. აქ უკვე აღარ არის სხვადასხვა ფერები, აქ უნდა მოხდეს თეთრის და შავის გარჩევა და მე დარწმუნებული ვარ, რომ საბოლოო ჯამში ასეც ჩამოყალიბდება. ყველაფერი იქითკენ მიდის, ტენდენცია სწორია, ველი კიდევ უფრო მეტ პოზიციებს“, – განაცხადა მიხეილ სააკაშვილმა.
ავტორი
ქეთა გაბრიაძე
