პოლიტიკური პლატფორმა „ახალი საქართველოს“ ლიდერი გიორგი ვაშაძე აშშ-ს მიერ საქართველოსთვის დაწესებულ სანქციებს ეხმაურება და აცხადებს, რომ პრეცედენტი არ არსებობს, როცა ამერიკის საფინანსო საბიუჯეტო კომიტეტი რამეს ამტკიცებს, ის შეიცვალოს კენჭისყრის დროს. ამიტომ, ოპოზიციონერი ლიდერის განმარტებით, აუცილებელია „ქართულმა ოცნებამ“ ხელი აიღოს კორუფციულ გარიგებებზე, მედიაზე თავდასხმებისაგან, ასევე, სასამართლოში შექმნილი კლანური მმართველობისაგან:
„ამერიკის კონგრესის საფინანსო საბიუჯეტო კომიტეტმა დაამტკიცა სანქციები საქართველოსთან მიმართებაში. საქართველოს უზომოდ ძვირი უჯდება ოლიგარქიულ კლანური მმართველობა „ქართული ოცნების“ სახით. ეს სანქციები პრობლემას უქმნის არა პირადად ივანიშვილს, არამედ საქართველოს სახელმწიფოს, თითოეულ მოქალაქეს.
ივანიშვილის მავნებლური რეჟიმიდან გამომდინარე ჩვენ მივედით იმ ზღვრამდე, რომ რუსეთთან ერთად ჩვენს რეგიონში ერთი გამონაკლისია საქართველო, რომლის მიმართაც სანქციების გამოყენება უწევს ამერიკას.
მეგობრებო, პრეცედენტი არ არსებობს, რომ ამერიკის საფინანსო საბიუჯეტო კომიტეტი რასაც ამტკიცებს, ის შეიცვალოს კენჭისყრის დროს.
რა არის გამოსავალი? – პირველ რიგში, რაც შეიძლება სწრაფად უნდა შევცვალოთ „ქართული ოცნების“ რეჟიმი.
რა უნდა გააკეთოს „ქართულმა ოცნებამ“ იმისათვის, რომ აშშ-ს სახელმწიფო დეპარტამენტის ხელმძღვანელი, მაიკ პომპეო მივიდეს კონგრესში და უარი ათქმევინოს ამერიკას ჩვენი ქვეყნის მიმართ სანქციებზე.
გეტყვით რა უნდა გააკეთოს „ქართულმა ოცნებამ“ პირველი: უნდა დაასრულოს კლანური მმართველობა სასამართლო ხელისუფლებაში; მეორე: ხელი უნდა აიღოს იმ კორუფციული სქემებისაგან, რომელიც ქვეყანაშია შექმნილი; მესამე: უნდა გაუხსნას გზა დასავლურ ინვესიტიციებს; მეოთხე: უარი უნდა თქვას მედიის შეზღუდვაზე და მედიაზე თავდასხმაზე; მეხუთე: გაათავისუფლოს პოლიტპატიმრები; მეექვსე: უარი თქვას სამართალდამცავი ორგანოების პოლიტიკური მიზნებისთვის გამოყენებაზე; მეშვიდე: რეალურად დაუბრუნდეს დასავლური განვითარების კურსს და უარი თქვას რუსეთთან თანამშრომლობაზე; მერვე: უარი თქვა ოლიგარქიულ მმართველობაზე, რომელზეც ამ დოკუმენტებშია საუბარი და ა.შ.“ – განაცხადა გიორგი ვაშაძემ.
ავტორი
თამთა ასლანიშვილი
