პარტიული კოორდინატორები, ძველი ბიჭები, კაბინაში ფოტოს გადაღების მოთხოვნა – ასე შეაფასა „ევროპული საქართველოს“ ერთ-ერთმა წევრმა ირაკლი აბესაძემ ,,ქართული ოცნების” მიერ ჩატარებული არჩევნები, ხოლო პარტია უგუნურ და არაპრაგმატულად მოიხსენია. მმართველი პარტიის ოპონენტის თქმით, არჩევნებისა და ამ საარჩევნო კოდექსის მთავარი გამოწვევა, ამომრჩევლის ნებაზე ზეწოლის, დაშინებისა და ძალადობის მაქსიმალურად გამორიცხვა იყო, რაც არ შესრულდა. ,,ევროპული საქართველოს” წევრმა აშშ-ის და ევროკავშირის საელჩოების განცხადებას, რომ საქართველომ არასაკმარისად გაითვალისწინა შენიშვნები, არ დაეთანხმა და განაცხადა, რომ მმართველმა პარტიამ, დამსახურებული შენიშვნები არა ნაწილობრივ, არამედ სრულად უგულვებელყო:
,,როდესაც ერთი მხარე არის აბსოლუტურად უგუნური და არაპრაგმატული -„ქართული ოცნება“, რომელიც მხოლოდ რიცხობრივი უპირატესობის გამო ცდილობს პოლიტიკურ ოპონენტებს ხელი გადაუგრიხოს პარლამენტში, სამწუხაროდ ვერანაირ ფართო კონსენსუსზე საუბარი ვერ შედგება.
ამ არჩევნებისა და ამ საარჩევნო კოდექსის მთავარი გამოწვევა უნდა ყოფილიყო ამომრჩევლის ნებაზე ზეწოლის, ამომრჩევლის დაშინებისა და მასზე ძალადობის მაქსიმალურად გამორიცხვა. აშშ-ს და ევროკავშირის საელჩოების განცხადება ადასტურებს, რომ ამ მიმართულებით არასაკმარისად იქნა შენიშვნები გათვალისწინებული, ხოლო თუ ჩვენ შევაფასებთ – საერთოდ არ იქნა მოცემული ისეთი ნორმები, რაც გამორიცხავს იმ მავნე პრაქტიკას, რომელსაც „ქართული ოცნების“ მიერ ჩატარებული არჩევნების განმავლობაში მუდმივად ვაკვირდებოდით.
პარტიული კოორდინატორები, ძველი ბიჭები, კაბინაში ფოტოს გადაღების მოთხოვნა, რაც პირდაპირი მცდელობაა ამომრჩევლის ნების გაკონტროლებისა და საარჩევნო უბნის გარეთ ზეწოლის და ძალადობის. ჩვენ გვქონდა კონკრეტული შეთავაზებები თუ როგორ შეიძლებოდა ამ საკითხის დარეგულირება. მათ უბრალოდ დიალოგიც არ ისურვეს და სწორედ ამიტომ მონაწილეობა არ მივიღეთ ამ პროცესში და არანაირ კონსენსუსზე საუბარი ამიტომაც არ შედგა,” – განაცხადა ირაკლი აბესაძემ.
ავტორი
ქეთა გაბრიაძე
