საქართველოს ეკონომიკისა და მდგრადი განვითარების მინისტრის, ნათია თურნავას განცხადებით რეგულარული ფრენების აღდგენის შემდეგ ბილეთის ფასი მინიმალური ღირებულების იქნება. მისი თქმით, ავიაკომპანია “აირზენას“ გარდა სხვა კომპანიებმაც გამოიჩინეს ინიციატივა საერთაშორისო ფრენების შესრულებაზე:
„აირზენა“ გააგრძელებს კომერციული რეისების შესრულებას ოღონდ რა თქმა უნდა, ჩვენთან შეთანხმებით, მაგრამ რა დავალებაც ახლა მივიღეთ პრემიერისგან, ეს არ არის კომერციული ფრენები, სადაც ავიაკომპანია თავისი შეხედულებისამებრ აწესებს ფასებს. უნდა აღინიშნოს, რომ „აირზენას“ თავის კომერციულს ჩარტერებზე ძალიან მაღალი ფასები აქვს. ახლა საუბარია სოციალური ფრენების სუბსიდირებაზე, ბილეთის შეზღუდული ღირებულებით, რომელსაც სახელმწიფო კონკრეტულ ავიაკომპანიებს დაუკვეთავს. ეს შეიძლება იყოს ნაწილობრივ „აირზენა“, მაგრამ სხვა ავიაკომპანიების მხრიდანაც ვხედავთ დაინტერესებას,“ – აღნიშნავს ნათია თურნავა.
შეგახსენებთ, პრემიერ-მინისტრმა საქართველოს მოქალაქეების ქვეყანაში დასაბრუნებლად ეკონომიკის სამინისტროს ჩარტერული რეისების გრაფიკის შემუშავება დაავალა. როგორც გიორგი გახარიამ აღნიშნა, ბილეთის მაქსიმალური ღირებულება 200 ევრო იქნება.
ავტორი
მახო ზავრაშვილი
