„ახალი საქართველოს“ თავმჯდომარის გიორგი ვაშაძის განცხადებით საქართველოში ყველაზე მნიშვნელოვანი პრობლემა სესხები და კრედიტებია, რომლის გაიაფებაც შესაძლებელია, ამისათვის ოპოზიციონერი ლიდერი ორ ინიციატივას წარმოადგენს, – ექვსი თვის მანძილზე გადავადებულ სესხებზე პროცენტი უნდა ჩამოიწეროს და ექვსი თვის შემდეგ ყველა საპროცენტო განაკვეთი უნდა განახევრდეს, რომლის რესურსიც არის:
„პრეზენტაცია ეხება ყველაზე მნიშვნელოვან პრობლემას, რაც დღეს საქართველოშია, სესხები და კრედიტები. გამიზნულია პირველ რიგში საქართველოს მოსახლეობისათვის, რათა გაჩვენოთ, რომ შესაძლებელია კრედიტები აბსოლუტურად ყველასათვის გავაიაფოთ, რადგან უსამართლოდ მაღალ პროცენტებს ვიხდით სესხებში და რაც მთავარია მთავრობისათვის, პირადად გახარიასთვის და ეროვნული ბანკის პრეზიდენტისათვის. ცრუ საქმით ნუ ხართ დაკავებულები და თქვენს ბიზნესებს ნუ კი ასუბსიდირებთ, არამედ ხალხის პრობლემა რაც არის, იმაზე იზრუნეთ.
3.420 მლრდ ლარი არის, 2016-19 წლებში ქართული ბანკების მოგება. 3-ჯერ მეტია საქართველოში საპროცენტო განაკვეთი, ვიდრე ევროკავშირის ქვეყნებში. ასევე დაახლოებით 3-ჯერ მეტია ქართული ბანკების მოგება, ვიდრე ყველა პოსტსაბჭოთა ქვეყანაში და ევროპის ქვეყნებში.
საქართველოში ჩამოყალიბებულია საბანკო მონოპოლია, რომელიც ჩამოაყალიბა ივანიშვილისა და „ქართული ოცნების“ ხელისუფლებამ.
იმისათვის, რომ არ გაკოტრდეს საქართველოს თითოეული მოქალაქე, იმისათვის, რომ არ გაკოტრდეს ქართული ბიზნესი და არ განულდეს ქართული ეკონომიკა გთავაზობთ ორ კონკრეტულ ინციატივას:
1. ექვსი თვის მანძილზე გადავადებულ სესხებზე პროცენტი უნდა ჩამოიწეროს;
2. შემდგომ ეტაპზე ყველა კრედიტის პროცენტი უნდა განახევრდეს;
ამისთვის საჭიროა სამი ნაბიჯი:
- ეროვნულმა ბანკმა ანტიმონოპოლიური პოლიტიკა უნდა გაატაროს;
2. უნდა შემცირდეს რეფინანსირების განაკვეთი;
3. უნდა შემცირდეს სარეზერვო განაკვეთები;
ეს დათვლილია საუკეთესო ეკონომისტებთან ერთად, რომ ეს შესაძლებელია და ეს უნდა გაკეთდეს დაუყოვნებლივ. ყველას უნდა ჩამოეწეროს ექვსი თვის მანძილზე გადავადებული სესხების პროცენტები და უნდა განახევრდეს საპროცენტო განაკვეთი მომავალში და არა ისე, როგორც ახლა ზრდიან. ურეკავენ კლიენტებს ბანკები და ეუბნებიან, რომ გაეზარდათ ადამიანებს პროცენტი. ეს უბრალოდ წარმოუდგენელია,“ – განაცხადა გიორგი ვაშაძემ.
ავტორი
თამთა ასლანიშვილი
”