ოპოზიციონერ კოლეგებს თანამშრომლობის და ერთიანობისაკენ მოუწოდებს პოლიტიკური პლატფორმა „ახალი საქართველოს“ თავმჯდომარე გიორგი ვაშაძე. მისი თქმით „ქართული ოცნება“ საკუთარ შედეგს სწორედ ოპოზიციის დაქსაქსულობით აღწევდა 8 წლის მანძლზე და მხოლოდ ერთიანობით მოხდება არჩევნებში წარმატების მიღწევა:
„ბოლო დღეებში ინტენსიურად მიმდინარეობს ოპოზიციის თანამშრომლობასთან დაკავშირებით მსჯელობა. 8 წლის მანძილზე „ქართული ოცნება“ და ივანიშვილი ყოველთვის აღწევდა საკუთარ შედეგს, სწორედ ოპოზიციის დაქსაქსულობით და ერთმანეთთან დაპირისპირებით.
ამიტომ ერთადერთი გზა, რომელიც ჩვენ უნდა ავირჩიოთ – ეს არის ერთიანობა, კონსოლიდაცია, თანამშრომლობა და აქედან გამომდინარე, მოვუწოდებ ყველა ოპოზიციურ კოლეგას, რომ უნდა ვითანამშრომლოთ მაჟორიტარული თვალსაზრისით აუცილებლად. განსაკუთრებით თბილისში ვფიქრობ, რომ უნდა გვყავდეს ერთიანი მაჟორიტარები, თავი შევიკავოთ ზედმეტი საჯარო განცხადებებისაგან და დავსხდეთ ისე, როგორც ჩვენ გვჩვევია და მივიღოთ ყველამ ერთად საერთო ქვეყნისთვის საჭირო გადაწყვეტილება.
აუცილებელია მაჟორიტარების თანამშრომლობა, ეს არის ჩვენი პოზიცია და აუცილებელია ამისთვის ყველამ გამოვძებნოთ საერთო ძალები და კომპრომისები, რომ როგორც გადავწყვეტთ ყველანი ერთად, ისე უნდა იყოს კანდიდატებიც, ისე უნდა იყოს თანამშრომლობითი პროცესი.
მთავარი უნდა გვესმოდეს არის ის, რომ ოქტომბრის არჩევნებისათვის ჩვენ უნდა დავასრულოთ ივანიშვილის მავნებლური მმართველობა ამ ქვეყანაში. გამარჯვების გზა კი არის თანამშრომლობაში ერთიანობაში და კოალიციაში, ამიტომ კიდევ ერთხელ მოგიწოდებთ ყველას, რომ დავსხდეთ და გავიაროთ ეს საკითხი.
ვფიქრობ, რომ უახლოეს დღეებში ჩვენ უნდა შევთანხმდეთ თბილისის მაჟორიტარებთან დაკავშირებით, რაზეც კონსოლიდირებული პოზიცია უნდა ვაჩვენოთ საზოგადოებას და კიდევ ერთხელ ნათლად დავანახოთ, რომ ჩვენ მივდივართ თანამშრომლობის, ერთიანობის გზით და გაცნობიერებული გვაქვს, რომ მტერს აქვს დიდი ფინანსური რესურსებიც, არის მავნებლური საარჩევნო კანონმდებლობა ქვეყანაში და ამის გადატეხვის ერთადერთი გზა არის ერთმანეთთან თანამშრომლობა და ერთიანობა
თბილისში აუცილებლად უნდა შევთანხმდეთ მაჟორიტრულ ოლქებთან დაკავშირებით. ის ოპოზიციური პარტიები, რომლებიც არ მიიღებენ მონაწილეობას ეს მათი გადასაწყვეტია, მაგრამ როგორც ვიცი ძირითადი ოპოზიციური ფლანგი, სწორედ ამ შეთანხმების გზით მიდის.
ამ განცხადებასაც ვაკეთებ იმიტომ, რომ გარკვეული დისონანსი არსებობს საზოგადოებაში. პირველადი დაკვეთა რაც არის გაჭირვების დამარცხების გზა, რაც ესახება ხალხს, ეს არის ოპოზიციის ერთიანობა და კონსოლიდირებული ქმედება, 8 მარტის შეთანხმებას ჩვენ სწორედ ჩვენი ერთიანი, კონსოლიდირებული პოზიციით მივაღწიეთ და არა დაქსაქსულობით და ცალ-ცალკე ბრძოლით“, – აცხადებს გიორგი ვაშაძე.
ავტორი
თამთა ასლანიშვილი
