გაერთიანებული ოპოზიცია “ძალა ერთობაშიას” ქუთაისის ოფისის ერთ-ერთი ლიდერი, გიორგი თევდორაძე ხელისუფლების ანტიკრიზისულ გეგმას აფასებს. მისი განმარტებით, ცენტრალური ხელისუფლება შექმნილი მდგომარეობის გამოყენებით პოლიტიკურ რეიტინგზე უფრო ზრუნავს, ვიდრე მოქალაქეებზე. ოპოზიციონერი ლიდერი ქუთაისის მძიმე მდგომარეობაზეც ამახვილებს ყურადღებას და ამბობს, რომ საპარლამენტო სტატუსის ჩამორთმევით ხელისუფლებამ ეს ქალაქი ეკონომიურად დეპრესიულ მდგომარებაში ჩააგდო.
„ზოგადად, კორონავირუსული ინფექციის შემდეგ ქვეყანაში არსებული მდგომარეობიდან ორ პრობლემას გამოვყოფდი:
პირველი – „ქართული ოცნების“ უმთავრესი ამოცანა გახდა ხელისუფლების შენარჩუნება და არა რეალურად ხალხის პრობლემების გადაჭრის მცდელობა. ხელისუფლების ე.წ. ანტიკრიზისულ გეგმას, ამ სიტუაციასთან საერთო არფერი აქვს, ეს უფრო „ქართული ოცნების“ ანტიკრიზისული გეგმაა, რითაც საკუთარი დაბალი რეიტინგის ამაღლებას ცდილობენ.
მეორე, – ამ ყველაფრიდან გამომდინარე მოქალაქეები ხელისუფლების მხრიდან ვერანაირ ბენეფიტს ვერ იღებენ. არის მხოლოდ 200-300 ლარიანი დახმარებების დაპირება.
სარწმუნო წყაროს მიხედვით, ის თანხები, რომელიც აკუმულირებული უნდა იყოს, ჯერ ხელისუფლებას მოძიებული არ აქვს. საუბარია იმ 3 მილიარდზე, რაც კრიზისის მართვისა და ზოგადად, სოციალური დახმარებებისათვის უნდა გამოიყოს.
კონკრეტულად ჩვენს ქალაქზე რომ ვისაუბროთ, ქუთაისი, როგორც ეკონომიკურად დეპრესიული ქალაქი, ყველაზე მძიმე მდგომარეობაშია. მისი გადარჩენის ერთადერთი გზა საპარლამენტო სტატუსი იყო, რაც ხელისუფლებამ წაართვა და პერსპექტივის გარეშე დატოვა.
ზოგად მძიმე ფონს ისიც ემატება, რომ ქალაქს მოქალაქეებზე ორიენტირებული თვითმმართველობა არ ჰყავს. ჩემთვის ძნელი წარმოსადგენია, რა გამოსავლის გზა უნდა შესთავაზოს ცენტრალურმა თუ ადგილობრივმა ხელისუფლებამ მოსახლეობას. ეს პოლიტიკური უუნარობა შემოდგომის არჩევნებზე უნდა დასრულდეს,“ – განაცხადა გიორგი თევდორაძემ.
ლიკა დევდარიანი
სააგენტო “პარალელის”
რეგიონალური კორესპონდენტი
