პოლიტიკური ორგანიზაცია “ერთიანი ნეიტრალური საქართველოს” ერთ-ერთი ლიდერი, ლევან ნიკოლეიშვილი მიზანშეწონილად მიიჩნევს სანქციების დაწესებას მათ წინააღმდეგ, ვინც არ აღიარებს კონსტიტუციურ ორგანოებს:
“კონსტიტუციური ორგანოების არაღიარების საჯარო მოწოდება არ არის პოლიტიკური აზრი, ეს არის ექსტრემიზმი, რომელიც პირდაპირ აზიანებს სახელმწიფოებრივ სტაბილურობას და დემოკრატიულ წესრიგს.
როდესაც არგუმენტებისა და ფაქტების გარეშე, მხოლოდ პოლიტიკური მოტივებით, კეთდება მსგავსი მოწოდებები, ისინი მიზანმიმართულად ასუსტებს სახელმწიფო ინსტიტუტების ლეგიტიმაციას. ეს პროცესი აძლიერებს პოლარიზაციას, ზრდის საზოგადოებრივ დაპირისპირებას და ქვეყანას სამოქალაქო კონფლიქტის რეალური რისკისკენ მიჰყავს.
სიტყვის თავისუფლება ვერ იქნება კონსტიტუციური წყობის წინააღმდეგ მიმართული ქმედებების გამართლება. სამართლებრივ სახელმწიფოში ხელისუფლება ვალდებულია დაიცვას საზოგადოება ექსტრემიზმისგან და იმ დესტრუქციული პროცესებისგან, რომლებიც საფრთხეს უქმნის ქვეყნის სტაბილურობასა და საზოგადოებრივ უსაფრთხოებას.
სწორედ ამიტომ აუცილებელია კანონის მიღება, რომელიც კონსტიტუციური ორგანოების არაღიარების საჯარო მოწოდებას სისხლის სამართლებრივად დასჯადად გახდის და მკაფიოდ დააწესებს წითელ ხაზს დემოკრატიულ სახელმწიფოში“, – წერს ლევან ნიკოლეიშვილი სოციალურ ქსელში.
