ქუთაისის საკრებულოს ფრაქცია “ერთიანი ნაციონალური მოძრაობის“ ლიდერმა გიგა შუშანიამ მერიასთან ბრიფინგი გამართა. მისი თქმით, ქუთაისის მუნიციპალიტეტის მერია პანდემიას საკუთარი პოლიტიკური ინტერესებისათვის იყენებს და ანტიკრიზისული ბიუჯეტზე მუშაობის ნაცვლად ადმინისტრაციული რესურსის მობილიზებითაა დაკავებული, რითაც არჩევნების გასაყალბებლად ნიადაგს ამზადებს.
„ქუთაისის თვითმმართველობაში განხორციელებული ბოლო საკადრო ცვლილებები, ანუ თანამშრომელთა რაოდენობის 89-ით გაზრდა ემსახურება იმ მიზანს, რომ არჩვნები გააყალბონ. მოვუწოდებ ქუთაისის მერიას, მსგავსი საკითხები დღის წესრიგიდან მოხსნას და პანდემიით დაზარალებული ადამიანების ინტერესების დაცვასა და სალიკვიდაციო გეგმის შემუშავებაზე იზრუნოს,“- განაცხადა გიგა შუშანიამ.
შეგახსენებთ, 15 აპრილს საჯარო ბიურომ გამონაკლისი დაუშვა და ქუთისის მუნიციპალიტეტის მერიაში თანამშრომელთა რაოდენობა 89 ადამიანით გაზარდა, მაშინ როდესაც კანონმდებლობით 31 კადრზე მეტის დანიშვნა აკრძალულია.
ლიკა დევდარიანი
სააგენტო “პარალელის”
რეგიონალური კორესპონდენტი
