4 ოქტომბრის საქმეზე დაპატიმრებული პაატა მანჯგალაძის შვილი, ნინი მანჯგალაძე ემოციურ შეფასებებს აკეთებს მამასთან მიმართებაში და მიმდინარე სასამართლო პროცესთან დაკავშირებით:
“ჩემთვის ეს ემოციური დღე იყო და ასე მგონია მამასთვისაც, რადგან ამდენი ხნის შემდეგ ის პირველად ვნახე… შორიდან მქონდა მხოლოდ მისალმების შესაძლებლობა… სხვა არაფრის უფლება არ მქონდა…
მოვისმინე მისი გამოსვლა სასამართლო პროცესზე და კიდევ ერთხელ დავრწმუნდი, რომ იგი არის სრულიად უსაფუძვლოდ და უსამართლოდ დაპატიმრებული. მის წინააღმდეგ არ არსებობს არანაირი მტკიცებულება, მხოლოდ ერთი ფოტოს გარდა, რაზეც ედავებიან და ვფიქრობ, თუ ამ ქვეყანაში სამართალი არსებობს, ის ამის გამო არ უნდა ისჯებოდეს, რაც შეიძლება მალე უნდა მოხდეს მისი გათავისუფლება.
ჩემთვის, როგორც შვილისთვის, ძალიან ძნელი იყო იმ უსამართლობის მოსმენა, რაც ზოგადად ამ საქმესთან დაკავშირებით ხდება.
მამაჩემი, პაატა მანჯგალაძე, როგორც პოლიტიკოსი, აკეთებდა პოლიტიკურ განცხადებებს, მათ შორის, მედიასთან და მას არანაირი სახის განცხადება არ გაუკეთებია არამშვიდობიან პროტესტში მონაწილეობასთან დაკავშირებით, მით უმეტეს, რაიმე სახის ორგანიზების თაობაზე“, – განაცხადა ნინი მანჯგალაძემ, ტვ”პირველის” ეთერში ჩართვისას.
