კომუნიკაციების კომისიამ საქართველოს წამყვან კერძო FM რადიო მაუწყებლების წარმომადგენლებთან სამუშაო შეხვედრა გამართა, რომელიც კერძო რადიო მაუწყებლობის ლიცენზირების პროცესის გამარტივების შესახებ ComCom-ის ინიციატივის წარდგენასა და მის განხილვას ემსახურებოდა. აღნიშნული რადიო მაუწყებლებისთვის მეტად მოქნილი პირობების შექმნას და ინვესტიციების დაზოგვას ისახავს მიზნად.
კერძოდ, ინიციატივა ითვალისწინებს მაუწყებლობის ზონების რაოდენობის 15-დან 28-მდე გაზრდას, მათ შორის, კახეთის, აჭარისა და სამცხე-ჯავახეთის ზონების დაყოფას სამ, ხოლო იმერეთის — ხუთ ზონად. მოცემული ცვლილება შეამცირებს თითოეული ზონის ტერიტორიას და მაუწყებლებისთვის საინვესტიციო ხარჯების დაზოგვას შეუწყობს ხელს.
ამასთან, კომუნიკაციების კომისია უფრო მოქნილს გახდის მოთხოვნებს გადამცემების რაოდენობის, მდებარეობისა და ტექნიკური პარამეტრების მიმართ, რაც რადიო მაუწყებლებს საშუალებას მისცემს, გადამცემების შეძენისა და განთავსების მათთვის ოპტიმალური ვარიანტი შეარჩიონ.
საგულისხმოა, რომ 2021 წელს, რადიო მაუწყებლობის ხარისხის გაუმჯობესების მიზნით, კომუნიკაციების კომისიამ მნიშვნელოვნად შეცვალა კერძო FM რადიო მაუწყებლების ლიცენზირების წესები: შემუშავდა რადიო მაუწყებლების კონკურსის ჩატარების სტრატეგია და განისაზღვრა ადგილობრივი მაუწყებლობის თხუთმეტი გეოგრაფიული ზონა. თითოეული ზონისთვის კომისიამ დაადგინა მაუწყებლობის ტექნიკური პირობები, როგორიცაა გადამცემების რაოდენობა, მდებარეობა და მათი ტექნიკური პარამეტრები, რომლებიც რადიო მაუწყებლებს უნდა დაეცვათ.
თუმცა, სამაუწყებლო ბაზრის შეფასებამ აჩვენა, რომ რადიო მაუწყებლების უმეტესობას გაუჭირდებოდა ლიცენზირების კონკურსის პირობებით განსაზღვრული სავალდებულო ინვესტიციის განხორციელება, რაც ლიცენზირების პირობების შეუსრულებლობის მიზეზით მაუწყებლობის შეწყვეტას გამოიწვევდა.
რადიო მაუწყებლებისგან მიღებული უკუკავშირის შესწავლის შემდეგ, კომუნიკაციების კომისია ლიცენზირების პროცესის გამარტივების მიზნით, ფორმალურ პროცედურებს დაიწყებს.
ინფორმაციას კომუნიკაციების კომისია ავრცელებს
