2025 წელს, იმ სკოლების რიცხვი, სადაც მედიაწიგნიერება ცალკე არჩევით საგნად ისწავლება, კვლავ მნიშვნელოვნად გაიზარდა და 293 შეადგინა. აღსანიშნავია ისიც, რომ 293 სკოლიდან 90%-ზე მეტს საქართველოს რეგიონების სკოლები წარმოადგენენ. ეს მნიშვნელოვანი შედეგები 2022 წელს კომუნიკაციების კომისიის, საქართველოს განათლების, მეცნიერებისა და ახალგაზრდობის სამინისტროს, ასევე გაეროს ბავშვთა ფონდის (UNICEF) ძალისხმევით დაწყებული „მედიაწიგნიერების ფორმალურ განათლებაში ინტეგრირების“ პროექტის დამსახურებაა. პროექტის შედეგად, მედიაწიგნიერება ფორმალურ განათლებაში 2023 წელს ინტეგრირდა. იმავე წელს, საგანი საქართველოს ექვსმა სკოლამ აირჩია და სწავლება დაიწყო. მომდევნო წელს მედიაწიგნიერებას უკვე 227 სკოლა ასწავლიდა. 2025 წლიდან კი, ასეთი სკოლების რიცხვი 66-ით გაიზარდა და სულ 293 შეადგინა.
„მედიაწიგნიერების ფორმალურ განათლებაში ინტეგრირების“ პროექტი X, XI და XII კლასის მოსწავლეებისთვის არჩევითი საგნის დამატებას და 1 სემესტრის განმავლობაში, მათთვის მედიაწიგნიერების, მედიისა და ინფორმაციის ენის, ინფორმაციის დამუშავებისა და დეზინფორმაციის შესახებ ცნობიერების ამაღლებას ისახავს მიზნად.
პროექტის საწყის ეტაპზე, სკოლებში ჩატარდა მედიაწიგნიერების საჭიროებების კვლევა, რომლის შედეგებზე დაყრდნობით შემუშავდა საგანმანათლებლო სტანდარტი, სასწავლო მოდული და სახელმძღვანელო. სპეციალურად შემუშავებული რესურსების გამოყენებით, მედიაწიგნიერების სწავლებაში ამ ეტაპისთვის 2600 მასწავლებელია გადამზადებული.
კომუნიკაციების კომისიისთვის, როგორც ქვეყანაში მედიაწიგნიერების განვითარებაზე პასუხისმგებელი უწყებისთვის, მედიაწიგნიერების საგნის სწავლებით სულ უფრო მეტი სკოლის დაინტერესება და ახალგაზრდების მედიაწიგნიერ მოქალაქეებად ჩამოყალიბება, ერთ-ერთი პრიორიტეტია.
ინფორმაციას კომუნიკაციების კომისიის საზოგადოებასთან ურთიერთობის სამსახური
