სასამართლო პროცესზე სიტყვით გამოსვლისას, “სტრატეგია აღმაშენებლის” ერთ-ერთმა ლიდერმა, პაატა მანჯგალაძემ, ყურადღება გაამახვილა ქვეყანაში არსებულ რეალობაზე და განმარტებები გააკეთა 4 ოქტომბრის მოვლენებთან დაკავშირებით:
“ჩვენ რასაც ვლაპარაკობთ, გარდა მშვიდობიანი ცვლილებისა, სხვა მიზანი არ გვქონია. არის სტერეოტიპი, რომ პოლიტიკოსი იმალება, ჩირგვებში მიდის, მე არ დავმალულვარ, ვიყავი ამ ხალხთან ერთად და ვმოქმედებდი კონსტიტუციის ფარგლებში. ვინც არ გვიცნობს მას ვეუბნები, რომ არავინ იქ თანამდებობისთვის არ ყოფილა გასული.
თუ სიმართლე არის ჩვენს მხარეს, რატომ არის წარუმატებელი ეს მოძრაობები? თქვენ გგონიათ, ჩვენ არ ვიცოდით, რომ პატარა გოგო-ბიჭები დროშებით სპეცრაზმს ვერ მოერეოდნენ? ჩვენ ორგანიზებული ჯგუფი არ ვყოფილვართ, პაატამ სურათი გადაიღო და სურათის გადაღებით თუ ვინმე ორგანიზატორია…
ისტორია ხშირად დამარცხებული გმირებისაა… როგორც 300 არაგველი შევიდა დამარცხებულ ბრძოლაში, ზუსტად ასეთი ადამიანები არიან, ხალხმა უნდა გაიგონოს ჩვენი სიმართლის ხმა.
ერთგვარი პოლიტიკური აპარტეიდია ქვეყანაში, “ქართულ ოცნებას” ყველაფრის უფლება აქვს, სხვას არაფრის უფლება არ აქვს… ზიზღში არ უნდა გადავიდეს ეს ყველაფერი…
რატომ ვმარცხდებით? მოწინააღმდეგე მხარე არის ბრუტალური…
მოტივაციაა, რომ ძალაუფლება დაუბრუნდეს ხალხს, ვისაც ეკუთვნის, კონსტიტუცია იწყება – “ჩვენ საქართველოს მოქალაქეები…“
მე ბრალს არ ვაღიარებ, არსებით განხილვაზე თქვენ ნახავთ, ყოველთვის ვამბობდი, რომ მხარს ვუჭერ აქციას, მაგრამ არ ვარ ორგანიზატორი, მე არ გავურბივარ პასუხისმგებლობას, მაგრამ მოძალადე, გამქცევი, ხალხის მიმტოვებელი – არავინ გაიმეოროს, შეურაცხყოფა იქნება“, – განაცხადა პაატა მანჯგალაძემ.
