“სტრატეგია აღმაშენებლის” ერთ-ერთი ლიდერი, ნანა ტოხვაძე 5 ოქტომბერს გამართულ მორიგ საპროტესტო აქციაზე პოლიტიკურ შეფასებებს აკეთებს ქვეყანაში მიმდინარე პროცესებთან და ხანგრძლივ უწყვეტ პროტესტთან დაკავშირებით:
“როგორც დაგპირდით, ჩვენ ისევ რუსთაველზე ვართ. ამ ხალხს, რომელსაც გააზრებული აქვს, თუ რატომ დგას რუსთაველზე – ვერც მუქარა, ვერც “დაგჭერთო”, ასეთი ტიპის განცხადებები ვერ შეაჩერებს მარტივი მიზეზის გამო, მათ ზუსტად იციან რა დევს სასწორზე. სასწორზე დევს ამ ქვეყნის თავისუფლება, დემოკრატია და ევროპული მომავალი.
ბიძინას მილიციელები სადღაც ჩიხებში არიან და ველოდებით, მოვიდნენ. თუ მშვიდობიანი პროტესტის გაუქმება იქნება ის, რისთვისაც ჩამოხვალთ, ხალხს დააპატიმრებთ და პოლიტიკურ ტყვეებს დაამატებთ, ჩვენ აქ ვართ და არაფრის გვეშინია იმიტომ, რომ ჩვენ ვართ მართლები; იმიტომ, რომ სამართლიანობა ჩვენს მხარესაა; იმიტომ, რომ ამ ქვეყანას აუცილებლად გაუმართლებს და დადგება ერთი მშვენიერი დღე, როცა გამარჯვებულ საქართველოში ერთად შევხვდებით“, – განაცხადა ნანა ტოხვაძემ.
