საქართველოს მე-5 პრეზიდენტი, მიხეილ სააკაშვილი ქვეყანაში ტურიზმის განვითარებაში შეტანილი მისი წვლილის შესახებ საუბრობს და ამჟამად შექმნილი რეალობის გამოსწორებაზე აკეთებს აქცენტს:
“ჩემი პრეზიდენტობის დროს საქართველოში ტურიზმი გაიზარდა 50 ათასიდან 7 მილიონამდე. ჩემი ამოცანა თავიდანვე იყო ის რომ ამ ზრდას მოჰყოლოდა საქართველოს პოზიტიური იმიჯის დამკვიდრება მთელს მსოფლიოში და ის რომ ქართველების მაქსიმალურად დიდ პროცენტს მატერიალური სარგებელი მიეღოთ ტურიზმის ბუმით.
რა ხდება ამათ პირობებში? ჩვენი ტურიზმი მთლიანად გადაორიენტირდა რუსებზე და აჭარის შემთხვევაში თურქებზე, თანაც თურქული ტურიზმი ძირითადად ჰგავს ტრაბზონში და რიზეში ტურიზმის მეორეხარისხოვან გაგრძელებას, იმის მაგივრად რომ მოგვეზიდა თურქული ელიტური ტურიზმი.
რუსების შემთხვევაში შემოდიან ძირითადად ძალიან ბანძი წარმომადგენლები. ამ ისედაც ძალიან მდარე ხარისხის ქვეყნის, დაახლოებით იგივე ხალხი რაც ადრე დადიოდა აფხაზეთში, ახლა შეესია დანარჩენ საქართველოს.
დასავლეთის ქვეყნებში საქართველოს იმიჯი იმდენადაა დაზარალებული, რომ იქიდან ტურიზმის ზრდა აღარ ხდება. გარდა ყველაფრისა რუსებმა იმავე ბათუმში, შარშანდელთან შედარებით ორჯერ გააძვირეს თითქმის ყველაფერი და ქართველი დამსვენებლები ძალიან მძიმე მდგომარეობაში აღმოჩნდნენ.
რაც შეეხება ტურისტულ ბიზნესს, აქაც სახეზეა რუსული ექსპანსია, რომელიც ავიწროებს ქართულ ბიზნესს, ვინაიდან ტურისტები შემოჰყავთ რუსულ ტურისტულ კომპანიებს, ემსახურებიან რუსების მფლობელობაში მყოფი სასტუმროები და კვების ობიექტები და ეს აღმავალი ტრენდია. სასწრაფოდ უნდა მოვუღოთ ამ ტენდენციას ბოლო, ჩავკეტოთ ტურისტული ბიზნესი რუსული კომპანიებისთვის და ამისთვის საჭიროა რეჟიმის მოშორება“, – აცხადებს მიხეილ სააკაშვილი.
