ოთხ დიდ ქალაქში თბილისში, რუსთავში, ბათუმსა და ქუთაისში 10 დღით მკაცრდება საგანგებო ზომები. 15 აპრილის 21:00 საათიდან ყველა სახის ტრანსპორტით იზღუდება შესვლა და გამოსვლა აღნიშნული ქალაქებიდან – ამის შესახებ განცხადება ქვეყნის პრემიერ-მინისტრმა გიორგი გახარიამ გააკეთა. პრემიერმა ასევე მიმართა პრეზიდენტ სალომე ზურაბიშვილს, რომ 10 მაისამდე გახანგრძლივდეს საგანგებო მდგომარეობა:
„ჩვენ ყველანი ერთად უკვე შევთანხმდით, რომ Covid- 19 არის გლობალური გამოწვევა. ეს არის უმძიმესი კრიზისი, როგორც თითოეული ჩვენი მოქალაქისთვის, ასევე ჩვენი ქვეყნის ინსტიტუტებისთვის და, რა თქმა უნდა, ეკონომიკისთვის.
დღეს, ჩვენ შეგვიძლია სამწუხაროდ, მოვახდინოთ ფაქტის კონსტატირება, რომ გვაქვს პირველი შემთხვევა, როდესაც ერთი დღის განმავლობაში გვყავს 30 ინფიცირებული ადამიანი. დღეის მდგომარეობით, კვლევა მიმდინარეობს დაახლოებით 500 ადამიანზე და, ფაქტობრივად, ჩვენ შეგვიძლია ვთქვათ, რომ ქვეყანაში სრულმასშტაბიანი შიდა გავრცელების ეტაპზე გადავედით.
თქვენ ყველას კარგად გესმით, რომ კარანტინის ის მძიმე ზომები, რომლებიც თითქმის ყოველკვირეულად ახლა ქვეყანაში მატულობს ამ ფაქტს ადასტურებს. ამასთან ერთად, უნდა მოვახდინოთ იმ ფაქტის კონსტატირებაც, რომ დღეს, მიუხედავად იმისა, რომ ჩვენ მადლობა უნდა ვუთხრათ ჩვენს ეპიდემიოლოგებს, ჩვენს მეცნიერებსა და ჩვენს ექიმებს, მაგრამ ზუსტად ვერავინ გვეუბნება, როდის იქნება კრიზისის და გავრცელების პიკი.
ეს არ ხდება მხოლოდ საქართველოში, ეს არის გლობალური გამოწვევა. დღეს შეუძლებელია ზუსტი პროგნოზი გაკეთება, როდის მოხდება გავრცელების პიკი. ამიტომ რა თქმა უნდა, გაურკვევლობის ამ ზონაში, მთავრობის ყველა ნაბიჯს და მოქმედებას აქვს კიდევ უფრო მეტი ფასი და მნიშვნელობა აქედან გამომდინარე მინდა გაცნობოთ, რომ მთავრობამ მიიღო გადაწყვეტილება ხვალ 15 აპრილიდან, 21:00 საათიდან 4 დიდ ქალაქში თბილისში, რუსთავში, ქუთაისსა და ბათუმში ყველა სახის მოძრაობა ქალაქში არა, ქალაქში შესვლა და გამოსვლა იყოს აკრძალული, 10 დღით. გარდა ამისა ჩვენ მივმართავთ პრეზიდენტს უახლესი დღეების განმავლობაში მიმართოს პარლამენტს საგანგებო მდგომარეობის ქვეყნის მასტაბით გაგრძელების თაობაზე 10 მაისამდე,“ – აცხადებს გიორგი გახარია.
უნდა აღინიშნოს, რომ საქართველოში კორონავირუსული ინფექციის რეკორდული მატება იყო ბოლო 24 საათის განმავლობაში. ლაბორატორიული კვლევების მონაცემების შესაბამისად 30 ახალი დადასტურებული შემთხვევა დაფიქსირდა.
stopcov.ge-ს ბოლო მონაცემებით საქართველოში კორონავირუსის დადასტურებული შემთხვევა – 296; მათ შორის გამოჯანმრთელებული – 69; გარდაცვლილი – 3; ამჟამად კარანტინის რეჟიმში იმყოფება – 4856 ადამიანი, ხოლო სტაციონარში მეთვალყურეობის ქვეშ – 458; უცხოეთიდან სამკურნალოდ გადმოყვანილი საქართველოს მოქალაქეების რაოდენობა კი – 3-ს შეადგენს.
ავტორი
თამთა ასლანიშვილი