განათლების ყოფილი მინისტრი, ილიას სახელმწიფო უნივერსიტეტის პროფესორი, პოლიტოლოგი გია ნოდია პოზიციას აფიქსირებს საქართველოს დამოუკიდებლობის დღესთან დაკავშირებით:
“სამწუხაროდ, ტყუილია, რომ საქართველოს დამოუკიდებლობის დღე ერის გამაერთიანებელი დღესასწაულია. უნდა იყოს, მაგრამ პირიქითაა.
ამიტომ ფარისევლობაა იმის თქმა, რომ ეს დღე რომელიმე პოლიტიკურმა პარტიამ თავისთვის არ უნდა გამოიყენოს.
დღეს საქართველოში არსებობს ორი პოლიტიკური პარტია, ანუ, რაც იგივეა, ორი პოლიტიკური მხარე. მათ შორის წყალგამყოფი სწორედ ეროვნული დამოუკიდებლობისადმი დამოკიდებულებაა.
ხალხი, ვინც ქუჩაში გამოდის საქართველოს და ევროპის დროშებით (სულერთია, რომელ დღეს მეტი გამოდის და რომელ დღეს – ნაკლები), ისევე როგორც ისინი, ვინც მათ პოზიციას არსებითად იზიარებს, დამოუკიდებლობის პარტიაა.
ფაქტობრივ ხელისუფლებაში მყოფ ძალას ესმის, რომ წინააღმდეგობაშია ეროვნული დამოუკიდებლობის იდეასთან და ამის გადაფარვას სიმულაციით ცდილობს. ის იმეორებს ილიას სიტყვებს „ჩვენი თავი ჩვენადვე გვეყუდნესო“, სინამდვილეში კი მათ საწინააღმდეგოდ მოქმედებს.
დამოუკიდებლობის პარტიამ უნდა გაიმარჯვოს!
გილოცავთ ამ დღეს!” – წერს გია ნოდია ფეისბუქის პირად გვერდზე.
