“ყოველდღეც რომ დაგვჭირდეს უნდა ვიდგეთ ქუჩაში, ყირაზეც დავდგეთ, შეუძლებელი შევძლოთ და საკუთარ თავებს ვაჯობოთ, რომ ამ ჯოჯოხეთს თავი დავაღწიოთ და ნორმალურ გზაზე დავბრუნდეთ” – ნინო ჯანგირაშვილი

ტელეკომპანია “კავკასიას” გენერალური დირექტორი ნინო ჯანგირაშვილი კონკრეტულ ფაქტებზე ამახვილებს ყურადღებას და საზოგადოებას შეუპუვრობისკენ, აქტიური პროტესტისკენ მოუწოდებს, ხელისუფლების შეცვლის მიზნით:

“ფაქტი არის ერთი და კონკრეტული: საქართველოს ცოტა ხნის წინ უახლოეს პარტნიორებად, მეგობრებად და მხარდამჭერებად ყავდა მსოფლიოს ყველაზე მდიდარი, ყველაზე დემოკრატიული და ყველაზე განვითარებული ქვეყნები და გაერთიანება – აშშ და ევროკავშირი. ჩვენი წაღმა–უკუღმა ბედის მიუხედავად 3 ათწლეულის მანძილზე მოვახერხეთ, რომ ყველაზე წარმატებული ქვეყნების კლუბში “მათიანი“ ვიყავით და სრული კარტბლანში გვქონდა, რომ წინ და წინ გვევლო, კეთილდღეობის და დაცულობის უმაღლესი სტანდარტებისკენ.

ეს ყველაფერი უსწრაფესად დავკარგეთ და სანაცვლოდ გვაქვს მარგარიტა სიმონიანის და მარია ზახაროვას კომპლიმენტები, ირან–ჩინეთ–რუსეთის მხრიდან ჩვენი ჩაყლაპვის პერსპექტივები. + ხელისუფლებად წოდებული სოციოპატების ჯგუფის აბსურდული ბოდვები, რომლებშიც თვითონვე აიხლართნენ, სრული სიღატაკის და გაჩანაგების რეალური პერსპექტივა, რომელიც ყველა ჩვენგანის ცხოვრებას ჯოჯოხეთად აქცევს.

გამოსავალი არსებობს. არცთუ ძალიან რთული. ყოველდღეც რომ დაგვჭირდეს უნდა ვიდგეთ ქუჩაში, ყირაზეც დავდგეთ, შეუძლებელი შევძლოთ და საკუთარ თავებს ვაჯობოთ, რომ ამ ჯოჯოხეთს თავი დავაღწიოთ და ნორმალურ გზაზე დავბრუნდეთ. სხვანაირად რომ მოხდეს, მე საკუთარ თავს ვერ ვაპატიებ“, – წერს ნინო ჯანგირაშვილი ფეისბუქის პირად გვერდზე.